Azərbaycan - Almaniya əməkdaşlığında yeni səhifə açılır
Almaniya Federativ Respublikasının Prezidentinin Azərbaycana rəsmi səfəri, iki ölkə arasında strateji tərəfdaşlıq münasibətlərinin daha da möhkəmləndirilməsi baxımından mühüm əhəmiyyət kəsb edir. Bu səfər həm ikitərəfli siyasi dialoqun dərinləşməsi, həm də iqtisadi əməkdaşlığın yeni mərhələyə qədəm qoyması üçün əlverişli zəmin yaratmışdır. Xüsusilə, enerji təhlükəsizliyi, bərpaolunan enerji sahəsində əməkdaşlıq və regional sabitlik kontekstində Azərbaycan-Almaniya münasibətlərində intensivləşən dinamika, Cənubi Qafqazda yeni geosiyasi düzənin formalaşmasına töhfə verir.
Mövcud beynəlxalq çağırışlar və enerji keçidi prosesində Azərbaycanın strateji mövqeyi, onun bərpaolunan enerji sahəsindəki ambisiyalı hədəfləri və Almaniyanın qabaqcıl texnoloji potensialı ikitərəfli münasibətlərə əlavə dəyər qatır. COP29 beynəlxalq iqlim konfransı çərçivəsində qurulan əməkdaşlıq modeli, ekoloji diplomatiyanın və yaşıl iqtisadiyyat prinsiplərinin siyasi qərarların mərkəzinə gətirilməsini göstərir. Bu kontekstdə Almaniya ilə qurulan çoxtərəfli dialoq yalnız iqtisadi prioritetləri deyil, həm də davamlı inkişaf hədəflərini əhatə edən kompleks və strateji əməkdaşlığın göstəricisidir.
Politoloq Arzuman Abdulkərimov Crossmedia.az-a Almaniya prezidentinin Azərbaycana səfərini şərh edib:
“Həm təkbətək görüşdə söhbət əsnasında, həm də nümayəndə heyətlərinin iştirakı ilə apardığımız danışıqlarda Almaniya-Azərbaycan əlaqələrinin gələcək inkişafı müzakirə edilmişdir. Mən tam əminəm ki, bu səfər bizim əlaqələrimizə yeni müsbət təkan verəcəkdir. İqtisadi sahədə əldə edilmiş nəticələr bizi təbii olaraq ruhlandırır. Çünki bu ilin yanvar-fevral aylarında bizim ticarət dövriyyəmiz təxminən üç dəfə artıb. Bunun əsas səbəbi Azərbaycandan Almaniyaya ixrac edilən xam neftin həcminin artması olmuşdur. Ona görə biz hesab edirik ki, gələcək illərdə öz ticarət dövriyyəmizin şaxələndirilməsi ilə bağlı daha fəal addımlar atmalıyıq, xüsusilə bərpaolunan enerji sahəsində - harada ki, Almaniya şirkətlərinin çox böyük təcrübəsi var, Azərbaycanın da çox böyük proqramı, planları var. Biz xarici investorların sərmayəsi hesabına 2030-cu ilə qədər bərpaolunan enerji növlərinin istehsal gücünü 6 giqavata çatdırmaq fikrindəyik və bu, tam realdır, bunun bir hissəsi Avropaya ixrac ediləcəkdir”.
Politoloq COP29 tədbiri çərçivəsində Almaniya-Azərbaycan əməkdaşlığından danışıb:
“COP29 beynəlxalq iqlim konfransı uğurlu nəticələr əldə etdi.
Bildiyiniz kimi, keçən il Azərbaycan COP29 beynəlxalq iqlim konfransına ev sahibliyi etmişdir. Bu istiqamət üzrə də bizim Almaniya ilə çox fəal əməkdaşlığımız olub. COP29-da 197 ölkəni təmsil edən 77 mindən çox iştirakçı qeydiyyatdan keçmişdir və bu konfrans böyük, uğurlu nəticələrlə zəngin idi. İştirak etməyən yeganə ölkə Ermənistan olmuşdur. Bu da təbii olaraq təəssüf hissi doğurur. Çünki xüsusilə indiki şəraitdə - Azərbaycanla Ermənistan arasında normallaşma prosesinin uğurla getdiyi bir zamanda Ermənistan tərəfinin bu beynəlxalq konfransı boykot etməsi başadüşülən deyildi. Bu gün bu məsələ də müzakirə olundu və Azərbaycanın mövqeyi Almaniya tərəfinə çatdırılmışdır”.
Arzuman Abdulkərimov iki dövlət arasındakı siyasi-iqtisadi əlaqələrdən danışıb:
“Almaniya Federativ Respublikası Azərbaycan Respublikasının müstəqilliyini tanıyan ilk dövlətlərdəndir. İki ölkə arasında diplomatik münasibətlər 20 fevral 1992-ci il tarixində qurulub və günümüzə qədər də artan inkişaf xətti üzrə davam etmişdir.
Azərbaycan və Almaniya arasında davamlı siyasi dialoq mövcuddur, iqtisadiyyat və humanitar sahələrində geniş əməkdaşlıq həyata keçirilir. Hansı ki, bu əməkdaşlıqlar çərçivəsində prezident İlham Əliyev AFR-ə 17 rəsmi işgüzar səfər etmişdir. Həmçinin ölkələrin baş nazir və xarici işlər nazirləridə müəyyən əməkdaşlıqlar çərçivəsində işgüzar səfərlər etmişlər
Ticarət və investisiyalar üzrə Almaniya-Azərbaycan yüksək səviyyəli İşçi Qrup 5 may 2011-ci ildə təsis edilmişdir.
Həmsədrlər:
Azərbaycan tərəfindən – iqtisadiyyat nazirinin müavini
Almaniya tərəfdən – Federal İqtisadiyyat və Enerji Nazirliyinin xarici iqtisadi siyasət idarəsinin baş direktoru Ekhard Frants.
İşçi qrupun indiyədək 9 iclası keçirilmişdir. 1-ci iclas 19-21 oktyabr 2011-ci ildə Berlində, sonuncu 9-cu iclas 10 fevral 2023-cü ildə Berlin şəhərində keçirilmişdir.
12 noyabr 2012-ci ildə Bakıda Alman-Azərbaycan Xarici Ticarət Palatası təsis edilmişdir”.
Ayhan Ağarzayev
13:00 03.04.2025
Oxunuş sayı: 8478
