Elnur Məmmədov: “Süni intellekt və İT Çinlə əməkdaşlıqda mərkəzi yer tutacaq”

Süni intellekt və informasiya texnologiyaları (İT) Azərbaycan ilə Çin arasında əməkdaşlığın gündəliyində mərkəzi yer tutacaq və bu sahələr tərəfdaşlıqda getdikcə daha əhəmiyyətli olacaq.

Crossmedia.az Çin KİV-nə istinadən xəbər verir ki, bunu xarici işlər nazirinin müavini Elnur Məmmədov Pekində Çin və Qloballaşma Mərkəzində çıxışı zamanı bildirib.

“Biz tez-tez Azərbaycan daxil olmaqla bir çox ölkələrdən keçən qədim İpək Yolu haqqında danışırıq. Bu gün həmçinin eyni tarixi marşrut boyunca inşa edilmiş rəqəmsal İpək Yolu haqqında bəhs edirik. Bu yaxınlarda Azərbaycan Avropa ilə alternativ rəqəmsal bağlantı təmin etmək üçün Xəzər dənizinin dibi ilə rəqəmsal kabel çəkilməsi haqqında saziş imzalayıb - biz bu layihəni rəqəmsal İpək Yolu adlandırırıq”, - o qeyd edib.

E.Məmmədov iki ölkə arasında ticarət əlaqələrinin gələcək trayektoriyası ilə bağlı nikbin olduğunu qeyd edərək rəqəmsal iqtisadiyyat, “yaşıl enerji” və infrastruktur kimi sahələrdə əməkdaşlığın əsas istiqamətləri kimi vurğulayıb: “Azərbaycan rəqəmsal transformasiyaya üstünlük verir. Bu rəqəmsal transformasiyada bizə kömək edən Çin yüksək texnologiya şirkətləri ilə güclü tərəfdaşlıq əlaqələrimiz var”.

🖨 Çap et

11:31 01.04.2025

Oxunuş sayı: 7001