Parisdə 30-dan çox ölkə Ukrayna üçün beynəlxalq təhlükəsizlik qüvvələrinin yaradılmasını müzakirə edəcək
Parisdə dünyanın 30-dan çox ölkəsinin hərbçiləri Ukrayna üçün beynəlxalq təhlükəsizlik qüvvələrinin yaradılmasını müzakirə edəcək.
Crossmedia.az xəbər verir ki, bu barədə "Associated Press" nəşri yazıb.
Bu təşəbbüsdə Asiya və Okeaniya ölkələri də iştirak edəcək.
Fransız hərbi rəsmisinin sözlərinə görə, bu qüvvələrin əsas məqsədi Ukraynada mümkün atəşkəsdən sonra Rusiyanın yeni hücumunun qarşısını almaqdır. Təşəbbüs çərçivəsində Fransanın və Böyük Britaniyanın fəal rol oynadığı bildirilir. Onlar hazır və bacarıqlı ölkələrdən ibarət bir koalisiya formalaşdırmağa çalışır.
Qeyd edək ki, Fransız rəsmisi həmçinin görüşdə müzakirə ediləcək layihənin məxfi olduğunu vurğulayıb. Onun sözlərinə görə, bu qüvvələr ağır silah və silah anbarlarını əhatə edəcək və ehtiyac yarandıqda bir neçə saat və ya gün ərzində Ukraynaya göndərilə biləcək.
Bildirək ki, danışıqların ilk hissəsində 30-dan çox ölkənin nümayəndələri təhlükəsizlik planını dinləyəcək. İkinci hissədə isə konkret müzakirələr aparılacaq və ölkələrdən bu qüvvələrə nə dərəcədə töhfə verə biləcəklərini açıqlamaları istəniləcək. Parisdə keçiriləcək görüşdə NATO-nun 32 üzv ölkəsindən demək olar ki, hamısının qərargah rəisləri və ya nümayəndələri iştirak edəcək. Ancaq üç NATO ölkəsi – Xorvatiya, Monteneqro və ABŞ tədbirdə olmayacaq.
Fransız rəsmisi bildirib ki, ABŞ-nin dəvət olunmaması Avropa ölkələrinin Ukraynanın təhlükəsizliyində daha çox məsuliyyət götürmək istəyini göstərir.
Bundan əlavə İrlandiya, Kipr və Avstriya rəsmiləri də görüşə qatılacaq. Avstraliya, Yeni Zelandiya, Yaponiya və Cənubi Koreya isə danışıqları məsafədən izləyəcək. Ukraynanı görüşdə Təhlükəsizlik və Müdafiə Şurasının üzvü olan hərbi rəsmi təmsil edəcək.
Xumar Əhmədova
23:16 10.03.2025
Oxunuş sayı: 849
