İsrail Qəzzanı zülmətə qərq etdi – Fələstin XİN-dən sərt reaksiya
Fələstin Xarici İşlər Nazirliyi İsrailin Qəzza zolağına elektrik enerjisini kəsmək və humanitar yardımların girişini dayandırmaq qərarını sərt şəkildə pisləyib.
Crossmedia.az xarici KİV-ə istinadən xəbər verir ki, nazirlik bu addımı "soyqırım, deportasiya və ilhaq siyasətinin davamı" kimi qiymətləndirərək, beynəlxalq ictimaiyyəti təcili tədbirlər görməyə çağırıb.
Nazirliyin bəyanatında qeyd olunur ki, İsrailin bu qərarı Qəzzada humanitar fəlakəti daha da dərinləşdirir və 2 milyondan çox fələstinlinin yardımlara çıxışını əngəlləyir.
Eyni zamanda, İsrail qüvvələrinin Qərb Şəriyədə, xüsusilə Cenin və Tülkərimdə həyata keçirdiyi "sistemli məhvetmə, deportasiya və ilhaq" siyasəti də kəskin tənqid edilib.
Bəyanatda beynəlxalq təşkilatların və BMT qətnamələrinin yerinə yetirilməməsinin İsraili qanunsuz addımlar atmağa daha da təşviq etdiyi vurğulanıb.
Fələstin Xarici İşlər Nazirliyi dünya birliyini İsrailin işğalçı dövlət olaraq öhdəliklərini yerinə yetirməyə məcbur etməyə və Qəzzada ağırlaşan humanitar böhranın qarşısını almağa çağırıb.
Xatırladaq ki, İsrail, HƏMAS-la 42 günlük atəşkəs və məhbus mübadiləsi razılaşmasının ilk mərhələsinin başa çatmasının ardından, martın 2-dən etibarən Qəzzaya humanitar yardımın girişini dayandırıb.
Bundan əlavə, İsrailin energetika naziri Eli Koen Qəzzaya elektrik enerjisinin verilişinin tamamilə dayandırıldığını açıqlayıb.
Aybəniz Səfərova
22:47 10.03.2025
Oxunuş sayı: 11028
