Qətər Suriyadan keçəcək boru kəməri layihəsini dəstəkləmir
Qətər hökuməti Suriyadan keçəcək boru kəməri layihəsinin artıq köhnəldiyini hesab edir və bu ideyanı dəstəkləmək niyyətində deyil.
Crossmedia.az xəbər verir ki, bu barədə Qətərin baş naziri Məhəmməd Jasim Al Tani məlumat verib.
O bildirib ki, qaz bazarında yeni texnologiyaların tətbiqi daha vacibdir və Qətər Suriyanın enerji təhlükəsizliyinə fərqli yollarla dəstək verməyə hazırdır.
Onun sözlərinə görə, Suriya Aralıq dənizində liman işlətmək və LNG (mayeləşdirilmiş təbii qaz) terminalları tikmək imkanlarına malik ola bilər. Lakin boru kəməri layihəsi bazar şərtlərinə uyğun gəlmir, çünki LNG həm daha çox gəlir gətirir, həm də daha az xərc tələb edir.
Baş nazir həmçinin vurğulayıb ki, Suriyanın enerji infrastrukturu soyuq müharibə dövründə Rusiya və İran neftinə əsaslanaraq qurulub və ciddi yenilənməyə ehtiyac var. Qətər hazırda Avropaya qaz çatdırmaq üçün yeni terminal və boru kəməri inşa edir. Bu boru kəməri qazı terminala ötürəcək, orada emal edildikdən sonra isə dünya bazarına çıxarılacaq.
Qeyd edək ki, Qətər 2030-cu ilə qədər LNG istehsalını 100 milyon tona çatdırmağı planlaşdırır.
Fatimə Məmmədova
20:35 10.03.2025
Oxunuş sayı: 10621
