Şimal dənizində neft tankeri və yük gəmisi toqquşdu
İngiltərənin Hull şəhəri sahillərinə yaxın ərazidə bir neft tankeri və yük gəmisi toqquşaraq yanğına səbəb olub.
Xilasetmə qayıqları və helikopterlərin də iştirak etdiyi genişmiqyaslı xilasetmə əməliyyatı aparılır.
Bazar ertəsi günü Şimal dənizində, İngiltərə sahillərində bir neft tankeri ilə yük gəmisi toqquşub. Qəzanın ardından geniş xilasetmə əməliyyatı başladılıb.
Crossmedia.az xarici mediaya əsasən bildirir ki, tanker alovlandıqdan sonra İngilis rəsmiləri Hull şəhərindən təxminən 10 dəniz mili uzaqlıqda baş verən hadisə yerinə xilasetmə qayıqları və yanğınsöndürmə gəmiləri göndəriblər.
Hollandiya istiqamətində hərəkət edən Solong adlı yük gəmisinin Portuqaliyaya bağlı Muxtar Madeira adalarında qeydiyyatdan keçdiyi müəyyən edilib.
Sahil Mühafizəsinin sözçüsü bazar ertəsi verdiyi açıqlamada bildirib:
“İngiltərə Sahil Mühafizəsi (His Majesty’s Coastguard) hazırda Şərqi Yorkşir sahillərində bir tanker ilə yük gəmisi arasında baş vermiş toqquşmaya təcili müdaxiləni əlaqələndirir”.
Açıqlamada həmçinin deyilir:
“Skegness, Bridlington, Maplethorpe və Cleethorpes-dən xilasetmə qayıqları, bir HM Coastguard sabitqanadlı təyyarəsi, yanğınsöndürmə qabiliyyətinə malik yaxınlıqdakı gəmilər, həmçinin Humberside-dən bir sahil mühafizəsi xilasetmə helikopteri hadisə yerinə göndərilib”.
Zərərin miqyası və hər hansı insan itkisi olub-olmadığı isə hələ ki məlum deyil.
Zəhra Ağayeva
19:51 10.03.2025
Oxunuş sayı: 984
