Gündəm

Elektron Bələdiyyə portalının təqdimatı keçirilib

Azərbaycan Bələdiyyələrinin Milli Assosiasiyalarının (ABMA) yaratdığı Elektron Bələdiyyə portalının istifadəyə verilməsinə həsr olunmuş tədbir keçirilib.

Crossmedia.az xəbər verir ki, tədbirdə ABMA-nın və Ədliyyə Nazirliyinin Bələdiyyələrlə iş baş idarəsinin nümayəndələri, Bakı şəhərində fəaliyyət göstərən şəhər bələdiyyələrin sədrləri və “Bələdiyyələrin fəaliyyətinin təbliği” İctimai Birliyinin sədri iştirak ediblər.

Azərbaycan Qəsəbə Bələdiyyələrinin Milli Assosiasiyasının sədri Hümbət Hüseynov son dövrlər bələdiyyələrdə vergi uçotunun qurulması, vergi daxilolmalarının artırılması və son birləşmədən sonra bələdiyyə institutunun nüfuzunun artırılması istiqamətində həyata keçirilən tədbirlər barədə məlumat verib:

"Fiziki şəxslərin binalara görə verməli olduğu əmlak vergisinin ödənilməsi mexanizminin təkmilləşdirilməsi məqsədilə “E-bələdiyyə” portalı yaradılıb. Portal bələdiyyə xidmətlərinin vətəndaşlara əlçatanlığını təmin edib, bələdiyyə-vətəndaş münasibətlərinin yeni səviyyəyə qaldırılmasına şərait yaradacaq".

Daha sonra ABMA-nın təsis etdiyi Bələdiyyələrin Onlayn Xidmət Mərkəzinin direktoru Adil Əhmədov E-bələdiyyə portalının funksional imkanları barədə məlumat verərək qeyd edib ki, yerli vergi ödəyiciləri “E-belediyye.az” portalında qurulmuş elektron kabinetlərinə “Digital Login” servisi üzərindən müxtəlif identifikasiya vasitələri ilə daxil ola bilərlər.

Vətəndaşlar elektron kabinetlərində bələdiyyədə uçotda olan vergitutma obyektləri, vergi borcunun tərkibi, ödəniş tarixçələri və bələdiyyə bildirişləri barədə ətraflı məlumat əldə etməklə yanaşı, vergi borclarını da ödəyə biləcəklər.

Mərkəz direktoru vurğulayıb ki, ilkin mərhələdə E-bələdiyyə portalına Bakı şəhərinin Nərimanov, Yasamal, Nizami, Səbail, Xətai, Binəqədi və Nəsimi bələdiyyələri qoşulacaq. Digər bələdiyyələrinin portala qoşulması isə mərhələli şəkildə davam etdirilməklə ilin sonuna kimi yekunlaşdırılması nəzərdə tutulur.

🖨 Çap et

18:08 10.03.2025

Oxunuş sayı: 961