Erməni ekspert təşvişdə: “Azərbaycan mümkün döyüş əməliyyatları üçün çox intensiv təlimlər hazırlayır və keçirir”
Azərbaycan əlverişsiz hava şəraitində, meşəlik və dağlıq ərazilərdə mümkün döyüş əməliyyatları üçün çox intensiv təlimlər keçirir.
Crossmedia.az xəbər verir ki, bunu Azərbaycan məsələləri üzrə erməni ekspert Tatevik Hayrapetyan sosial şəbəkə hesabında bildirib.
Onun sözlərinə görə, yanvarın 20-dən fevralın 7-dək Azərbaycan Silahlı Qüvvələri Türkiyənin Qars şəhərində təşkil etdiyi “Qış-2025” hərbi təlimlərində iştirak edib. Təlimlər kəskin soyuq şəraitdə xüsusi olaraq təşkil olunub. Təlimlərdə Azərbaycan da daxil olmaqla, 18 ölkədən ümumilikdə 12.199 hərbi qulluqçu iştirak edib. Fevralın 7-dən 11-dək isə Azərbaycan, Pakistanda keçirilən AMAN-2025 birgə hərbi təlimlərində iştirak edib.
Eyni zamanda, fevralın 28-də Azərbaycanda Hərbi Dəniz Qüvvələrinin Dəniz piyadaları ilə “Dərin qar və şiddətli soyuqlarda döyüş” mövzusunda təlim keçirilib.
Təlimin ssenarisinə əsasən, bölmələr şərti düşmənin təxribat-diversiya qrupunun zərərsizləşdirilməsi üzrə tapşırıqları yerinə yetiriblər. Kəşfiyyat məlumatları əsasında düşmən sığınacaqlarının koordinatları dəqiqləşdirildikdən sonra dəniz piyadaları dərin qarla örtülmüş meşəlik ərazidə təyin olunan istiqamətdə irəliləyiblər.
Hayrapetyan qeyd edib ki, açıq mənbələrdən əldə edilən məlumatlara əsasən, Azərbaycan meşəlik və dağlıq ərazidə əlverişsiz hava şəraitində mümkün döyüş əməliyyatları üçün çox intensiv təlimlər hazırlayır və keçirir. Üstəlik, bu məqsədlə ən döyüşə hazır bölmələrdən biri olan dəniz piyadalarından istifadə olunur. O, əlavə edib ki, kəşfiyyat və qapalı qurumlar təlimlər barədə daha ətraflı məlumat əldə edə bilərlər.
Fatimə Məmmədova
16:56 10.03.2025
Oxunuş sayı: 11057
