Almaniya tətil səbəbindən 13 hava limanında uçuşları ləğv etdi
Bir günlük iş dayandırma aksiyası paytaxt Berlin başda olmaqla, Frankfurt, Düsseldorf və Münhen kimi mərkəzlərdə minlərlə uçuşun ləğv olunmasına səbəb olub.
Crossmedia.az xarici mediaya əsasən xəbər verir ki,Frankfurt və Münhenin də daxil olduğu 13 Almaniya hava limanında və ölkənin digər əsas istiqamətlərində işləyən işçilərin bir günlük tətili 10 mart bazar ertəsi günü əksər uçuşların ləğvinə səbəb olub.
Bu gün (10 mart) ölkə üzrə yarım milyondan çox insan səyahət problemləri ilə üzləşib.
Gecə yarısı başlayan 24 saatlıq tətil hava limanlarındakı dövlət sektorunda çalışan işçiləri, həmçinin yer xidməti və təhlükəsizlik personalını da əhatə edir.
Almaniyanın ən işlək hava limanı olan Frankfurt Hava Limanının idarəçisi bazar ertəsi günü buradan heç bir sərnişin təyyarəsinin havaya qalxmayacağını bildirib.
Çərşənbə axşamı da gecikmələr və ləğvlər ola bilər. Planlaşdırılan 1.116 gəliş və gediş uçuşundan 1.050-si artıq ləğv edilib və bu sayın artması gözlənilir.
Berlin Hava Limanında bütün planlı gediş və gəlişlər ləğv edilib, Hamburq Hava Limanı isə heç bir uçuşun mümkün olmayacağını açıqlayıb.
Köln/Bonn Hava Limanı müntəzəm sərnişin xidmətinin olmadığını elan edib. Münhen Hava Limanı isə sərnişinlərə “çox məhdudlaşdırılmış uçuş proqramı” gözləmələri tövsiyə olunub.
Almaniyada hava limanı işçiləri harada tətil edir?
Xidmət işçiləri həmkarlar ittifaqı “ver.di”nin tətilləri Hamburq, Bremen, Hannover, Berlin, Düsseldorf, Dortmund, Köln/Bonn, Leypsiq/Halle, Ştutqart və Münhen hava limanlarını əhatə edib.
Daha kiçik olan Weeze və Karlsruhe/Baden-Baden hava limanlarında isə yalnız təhlükəsizlik işçiləri tətilə çağırılıb. Həmkarlar ittifaqı tətillə bağlı qərarı cümə günü elan edib.
Lakin Hamburq Hava Limanı tədbirin təsirli olması üçün 9 mart bazar günü qısa müddətli bir iş dayandırma aksiyasını bazar ertəsi keçiriləcək tətilə əlavə edib. Bunun nəticəsində təxminən 300 uçuş ləğv edilib.
Almaniyada maaş danışıqlarında tez-tez istifadə edilən bir taktika olan “xəbərdarlıq tətilləri” iki ayrı maaş mübahisəsi ilə bağlıdır: hava limanı təhlükəsizlik işçiləri üçün yeni maaş və iş şəraiti müqaviləsi danışıqları və federal və bələdiyyə hökumətlərində işləyən işçilərin maaşları ilə bağlı daha geniş bir mübahisə.
İkinci mübahisə artıq Köln/Bonn, Düsseldorf, Hamburq və Münhen hava limanlarında tətillərə səbəb olub.
Bu mübahisə ilə bağlı maaş danışıqlarının cümə günü yenidən başlanması gözlənilir, hava limanı təhlükəsizlik işçiləri üçün növbəti görüşlərin isə 26 martda baş tutacağı planlaşdırılır.
Zəhra Ağayeva
16:34 10.03.2025
Oxunuş sayı: 832
