Tramp yenidən Qrenlandiyanı ABŞ-ə birləşdirmək istəyini ifadə edib
ABŞ prezidenti Donald Tramp Qrenlandiyanı ABŞ-ə birləşdirmək niyyətini bir daha təkrarlayıb. Lakin o vurğulayıb ki, bu proses yalnız ada sakinlərinin qərarı əsasında həyata keçirilə bilər.
Crossmedia.az xəbər verir ki, bu barədə Tramp Truth Social sosial şəbəkəsində yazıb.
ABŞ Qrenlandiya xalqının öz gələcəyini müstəqil şəkildə müəyyən etmək hüququnu tam dəstəkləyir və onların təhlükəsizliyini təmin etməyə davam edəcək. "Biz yeni iş yerləri yaratmaq və sizi varlandırmaq üçün milyardlarla dollar investisiya qoymağa hazırıq. Əgər siz qərarınızı versəniz, sizi dünyanın ən böyük millətinin – Amerika Birləşmiş Ştatlarının bir hissəsi olmağa dəvət edirik," – deyə Tramp qeyd edib.
Onun bu açıqlaması Qrenlandiyanın siyasi statusu və ABŞ-nin Arktika regionundakı maraqları ilə bağlı yeni müzakirələrə səbəb olub.
Xumar Əhmədova
16:01 10.03.2025
Oxunuş sayı: 9848
