Azərbaycanla Ermənistan anlaşdı: İctimaiyyət qərarları razılıqla qarşılayır
Azərbaycan – Ermənistan dövlət sərhədində Azərbaycan Respublikası Əsir və itkin düşmüş, girov götürülmüş vətəndaşlarla əlaqədar Dövlət Komissiyası və Ermənistan Respublikası Əsir düşmüş, saxlanılmış və itkin (yeri məlum olmayan) şəxslər üzrə idarələrarası komissiyasının nümayəndələri arasında görüş baş tutub. Görüşdə itkin düşmüş şəxslərin taleyinin müəyyənləşdirilməsinə dair fikir mübadiləsi aparılıb və komissiyalar arasında ikitərəfli əsasda müzakirələrin davam etdirilməsi barədə razılıq əldə olunub.
Azərbaycan və Ermənistan komissiyalarının bu görüşü itkin və əsir düşmüş şəxslərin taleyinin aydınlaşdırılması baxımından real nəticələr verə bilərmi?
Mövzu ilə bağlı Milli Məclisin deputatı Aydın Mirzəzadə Crossmedia.az-a açıqlama verib: “Ermənistan və Azərbaycan bu gün sülh müqaviləsi imzalamaq ərəfəsindədir və hər iki tərəfin verdiyi məlumata görə bir çox məsələlərdə razılığa gəlinib. Məsələlərdən biri də itkin və əsir düşmüş şəxslərin taleyinin müəyyənləşməsidir. Azərbaycan və Ermənistan bu gün vasitəçi olmadan bir-biri ilə əlaqə qura və birgə məsələlər müzakirə edə bilirlər və bu müsbət haldır. Azərbaycan indiyə qədər çoxaylı itkin düşmüş vətəndaşının və hərbçisinin taleyini Ermənistan tərəfdən sorğu edir. Əlbəttə bu mürəkkəb, uzunmüddətli və hər bir şəxsin taleyi ilə bağlı araşdırma aparılması vacib olan məsələdir. Əgər hər iki tərəfin müvafiq komissiyaları görüşübsə şübhəsiz orda ortaya konkret siyahılar və məsələlər qoyulub. Komissiya ümumi istiqamətləri müəyyənləşdirir. Amma hər iki komissiyanın tərkibində konkret məsələlərin həlli ilə məşğul olan işçi qrupları mövcuddur. Tərəflərin bu məsələ ətrafında müzakirə aparması təqdirəlayiqdir. Mən arzu edərdim ki, Ermənistan tərəfdən təkcə bəyənatlar verilməsin. Həm də konkret fəaliyyətlər görülsün”.
Ayhan Ağarzayev
14:55 08.02.2025
Oxunuş sayı: 5426
