Ukrayna səfiri Azərbaycana davamlı dəstəyinə görə təşəkkür edib
Azərbaycanın davamlı dəstəyinə görə təşəkkür edirik.
Crossmedia.az xəbər verir ki, bu barədə Ukraynanın Azərbaycandakı səfiri Yuri Husyev “X” platformasındakı paylaşımında bildirib.
“Azərbaycan Ukraynaya yeni humanitar yardım göndərib! Prezident İlham Əliyevin imzaladığı Sərəncama əsasən, 1 milyon ABŞ dolları dəyərində ayrılmış vəsaitlə maliyyələşdirilən kabellər və enerji avadanlıqlarını daşıyan humanitar yardım Ukraynanın enerji infrastrukturunun bərpasına kömək etmək üçün yola düşüb. Azərbaycana davamlı dəstəyinə görə təşəkkür edirik!”, - səfir qeyd edib.
Qeyd edək ki, bu gün Azərbaycan Respublikasından Ukraynaya növbəti humanitar yardım göndərilib. Bu məqsədlə, Azərbaycan Respublikasının Prezidenti İlham Əliyevin 5 fevral 2025-ci il tarixli Sərəncamına əsasən, bir milyon ABŞ dollarının manat ekvivalentində vəsait ayrılıb.
Bu vəsait çərçivəsində göndərilən ilkin humanitar yardım yükünə elektrik kabelləri, naqillər və transformatorlar daxildir. Ukrayna tərəfindən daxil olmuş müraciətə əsasən, qeyd edilən təchizat müharibədən zərər çəkmiş ərazilərin elektrik enerjisi ilə dayanıqlı təchizatının bərpası üçün nəzərdə tutulur.
Xatırladaq ki, mövcud vəziyyətlə əlaqədar Azərbaycan tərəfindən Ukraynaya göstərilmiş yenidənqurma və humanitar məqsədli yardımların ümumi məbləği 40 milyon ABŞ dollarını keçib. 2025-ci ilədək elektrik avadanlıqları qismində 120-yə yaxın transformator və komplekt transformator məntəqəsi, 70-ə yaxın generator, habelə 3.3 milyon metrdən çox kabel və naqil Ukraynaya yola salınıb.
14:13 07.02.2025
Oxunuş sayı: 3790
