Cəmiyyət
MEK-də “Qəhrəmanlıq zirvəsi” kitabının təqdimatı keçirilib
“Modern İnkişaf və Ailə” İctimai Birliyinin sədri, Yeni Azərbaycan Partiyasının Veteranlar Şurasının üzvü Zərifə Quliyeva müəllifi olduğu “Qəhrəmanlıq zirvəsi” kitabını Azərbaycan Milli Elmlər Akademiyasının (AMEA) Mərkəzi Elmi Kitabxanasına (MEK) təqdim edib.
Crossmedia.az xəbər verir ki, görüşdə Prezidentin İşlər İdarəsinin İctimai-Siyasi Sənədlər Arxivinin direktoru Elmira Ələkbərova, Birinci Qarabağ müharibəsi şəhidlərinin ailə üzvləri Mətanət Qafarova və Lətifə Novruzova, Şəhid Ailələri, Əlilləri və Müharibə Veteranlarının Hüquqlarının Müdafiəsi İctimai Birliyinin sədr müavini, qazi Ramin Şirinov, qazi Asxab Kalayev, “Qarabağ Qaziləri” Birliyinin sədr müavini Seymur Abdullayev, Dövlət İmtahan Mərkəzinin nümayəndəsi Afiqə Batıyeva və Xocalı şəhər sakini Çinarə Sadiqova iştirak ediblər.
Tədbirdə çıxış edənlər “Qəhrəmanlıq zirvəsi” kitabının əhəmiyyətindən bəhs edərək, bu kəsimdən olan nəşrlərin Azərbaycanın qəhrəmanlıq tarixinin yaşadılması, şəhid və qazilərin döyüş yolunun təbliği, eləcə də gələcək nəsillərə çatdırılması baxımından mühüm rol oynadığını vurğulayıblar.
Qeyd olunub ki, kitabda 44 günlük Vətən müharibəsi, şəhidlərin həyat və döyüş yolu, hərbi əməliyyatlar zamanı göstərdikləri igidliklər haqqında ətraflı məlumatlar yer alıb. Nəşr Azərbaycanın hərb tarixinin təbliği, qəhrəmanların tanıdılması, yeniyetmə və gənclərin vətənpərvərlik ruhunda tərbiyəsi baxımından böyük əhəmiyyət kəsb edir.
Kitabın müəllifi Zərifə Quliyeva çıxışında Ulu Öndər Heydər Əliyevin müəyyən etdiyi dövlətçilik və vətənpərvərlik ideyalarının, Prezident İlham Əliyevin rəhbərliyi ilə Azərbaycanın ərazi bütövlüyü və suverenliyinin bərpası uğrunda qazanılmış tarixi Zəfərin təbliği baxımından bu cür nəşrlərin müstəsna rolunu diqqətə çatdırıb. O, kitabın ərsəyə gəlməsində əsas məqsədin şəhid və qazilərin qəhrəmanlıq salnaməsini tarixdə əbədi yaşatmaq olduğunu bildirib. Müəllif vurğulayıb ki, Azərbaycan var olduqca şəhidlərimizin xatirəsi daim uca tutulacaq, qazilərimizin vətənpərvərlik nümunələri unudulmayacaq. Z.Quliyeva bu missiyanın həyata keçirilməsində MEK-in də xüsusi rolunu yüksək qiymətləndirib.
MEK-in Qarabağ müharibəsi qəhrəmanları fondunun rəhbəri, şəhid polkovnik Babək Səmidlinin bacısı Röksanə Səfərzadə çıxış edərək Z.Quliyevaya kitabı kitabxanaya təqdim etdiyinə görə minnətdarlığını bildirib və nəşrin fond üçün dəyərini vurğulayıb. O, fondda qorunan materialların Azərbaycanın ərazi bütövlüyü və suverenliyi uğrunda mübarizə aparmış qəhrəmanların xatirəsinin yaşadılmasına və gələcək nəsillərə çatdırılmasına xidmət etdiyini qeyd edib.
Görüşdə iştirak edən digər qonaqlar da bu istiqamətdə maarifləndirici nəşrlərin hazırlanmasının vacibliyini diqqətə çatdırıblar.
11:12 27.10.2026
Oxunuş sayı: 75
