“ABŞ ilə Rusiya münaqişəni tək bir razılaşma şəklində həll edə bilməyəcək” - ŞƏRH
Ukraynada davam edən münaqişənin həlli istiqamətində beynəlxalq səviyyədə aparılan danışıqlar yeni mərhələyə qədəm qoyur. Xüsusilə, ABŞ Prezidenti Donald Trampın rəhbərlik etdiyi administrasiya ilə atəşkəsə nail olunması üçün aparılacaq müzakirələr Ukrayna üçün xüsusi əhəmiyyət daşıyır. Ekspertlər bu barədə maraqlı fikirlər səsləndirirlər.
Donald Trampın rəhbərlik etdiyi ABŞ administrasiyasının Ukraynada atəşkəsə nail olmaq üçün hansı konkret addımları atacağı ilə bağlı siyasi şərhçi Aqşin Kərimov Crossmedia.az-a şərh verib.
Onun sözlərinə görə, Donald Tramp Rusiya-Ukrayna müharibəsi ilə bağlı ABŞ-nin mövqeyini andiçmə nitqində qeyd etməyib, yəni, inaqurasiya mərasimində Kiyevin taleyi barədə bir kəlmə söz deməyib:
“Bununla belə, prezident səlahiyyətlərinə başlayar-başlamaz Rusiyanı müharibəni dayandırmayacağı təqdirdə misilsiz sanksiyalarla hədələdi. Hərçənd ki, bunun özü də Kiyevin maraqlarına cavab vermir. Ona görə ki, Tramp bir tərəfdən Rusiyanı sanksiyalarla təhdid edir, digər yandan isə xarici yardımları 90 gün müddətinə dondurur. Lakin Ukrayna rəsmilərinin qənaətincə, Trampın “dondurma əməliyyatı” beynəlxalq yardımlara şamil edildiyi üçün Ukraynaya verilən hərbi yardımlara təsir etməyəcək. Lakin Ukraynanın cəbhə xəttində vəziyyəti gərgindir və o, Rusiyanın Kursk vilayətində də getdikcə uğursuzluq səmtinə doğru sürüşür. Bunların müşayiətində isə Donald Trampın Rusiya-Ukrayna müharibəsinə son qoymaq üçün planlarında qeyri-müəyyənlik elementləri daha qabarıq görünür. Bu, onu deməyə əsas verir ki, Trampın Rusiya-Ukrayna münaqişəsini sonlandırmaq və ya dondurmaq üçün apardığı siyasət çox vaxt və səy tələb edə bilər. Kiyevin pisləşən şərtlərlə üzləşməsi fonunda isə bu, Ukrayna üçün acınacaqlı bir ssenari deməkdir. Çünki Trampla Rusiya Prezidenti Vladimir Putin masa arxasına otursa belə, bu, ilk dəqiqədən Rusiya-ABŞ daha geniş qarşıdurmasının bir hissəsinin davamı olacaq. Belə vəziyyət mövcud situasiyanın davam etməsi anlamını verir, hərçənd ki, Tramp-Putin müzakirələri Vaşinqton-Moskva xəttində mövqelərin uzlaşdırılması baxımından önəm daşıyacaq”.
Analitik bildirib: “Çox güman ki, ABŞ ilə Rusiya münaqişəni tək bir razılaşma şəklində həll edə bilməyəcək. Ehtimal ki, Ağ Evlə Kreml uzun müddət ərzində müxtəlif templərlə müzakirə əsnasında bir sıra sövdələşmələrə üstünlük verəcək. Bu müddət ərzində isə ABŞ-nin Rusiyanı güzəştə məcbur etmək üçün sanksiyalar siyahısını genişləndirəcəyi istisna olunmur. Tramp yəqin ki, Kremli hədələyərkən prosesi bu cür təsvir edib”.
A.Kərimovun fikrincə, göründüyü kimi, müharibənin “bitməsi” üçün əsas proses Tramp-Putin telefon danışığından başlamalıdır: “Sonrakı mərhələdə isə ABŞ və müttəfiqləri Ukrayna ilə intensiv məsləhətləşmələr aparmalı, mümkün atəşkəs şərtləri və münaqişənin həlli üçün yol xəritəsini razılaşdırmalıdır. Ukrayna üçün pisi odur ki, onun taleyi daha çox Ağ Evlə Kreml arasında aparılan danışıqların nəticəsindən asılıdır. Aşkar hiss olunur ki, Ukraynada sülhə gedən sürətli və asan yol yoxdur. Həm də ona görə ki, sürprizləri sevən Tramp proqnozlaşdırılanların əksinə olaraq, müharibəni uzatmaq üçün vasitə və qərara malik olduğunu nümayiş etdirə bilər”.
Fidan Hacızadə
14:18 24.01.2025
Oxunuş sayı: 5015
