Azərbaycanda sabit genişzolaqlı internet xidmətlərinə qoşulma prosesi sürətlənir
Azərbaycanda rəqəmsal inkişafın sürətləndirilməsi istiqamətində əhəmiyyətli addımlar atılmaqdadır. Xüsusilə genişzolaqlı internet xidmətlərinə çıxışın artırılması və keyfiyyətinin yaxşılaşdırılması ölkənin informasiya-kommunikasiya texnologiyaları sektorunun prioritet istiqamətlərindən biridir. Bu addımlar həm şəhər, həm də ucqar kənd yerlərində rəqəmsal bərabərsizliyin azaldılmasına xidmət edir. İnfrastruktur layihələri, dövlət dəstəyi və beynəlxalq əməkdaşlıq vasitəsilə sabit internet xidmətlərinin daha geniş əhali qruplarına çatdırılması hədəflənir. Bu proses həm ölkənin iqtisadi potensialının artırılmasına, həm də rəqəmsal texnologiyalardan istifadənin genişlənməsinə təkan verir.
Mövzu ilə bağlı Beynəlxalq Rabitə Akademiyasının Azərbaycan Filialının Fəxri Prezidenti, Rəqəmsal İnkişaf və Nəqliyyat Nazirliyi yanında İctimai Şuranın sədri, texnika üzrə fəlsəfə doktoru, professor Siruz Abasbəyli Crossmedia.az-a açıqlama verib. O bildirib ki, Azərbaycanda sabit genişzolaqlı internet xidmətinə qoşulma prosesi təkmilləşdirilir.
Sədrin sözlərinə görə, hazırda bu xidmətə qoşulma müddəti abunəçinin yaşadığı məkana (həyət evi və ya çoxmərtəbəli bina) görə dəyişsə də, adətən 1-7 təqvim günü ərzində həyata keçirilir. Prosesin daha sürətli olması üçün abunəçilərə “Aztelekom” şirkətinin rəsmi internet portalı vasitəsilə (aztelekom.az) müraciət etmələri tövsiyə olunur:
“Xidmətin keyfiyyət göstəricilərinin yüksək səviyyədə saxlanılması üçün abunəçinin qəbul etdiyi siqnal səviyyəsi real vaxt rejimində monitorinq edilir. Hər hansı problem aşkarlanarsa, texniki heyət operativ müdaxilə həyata keçirir".
S.Abasbəyli qeyd edib ki, abunəçilərin ən çox rastlaşdığı problemlərdən biri də mənzillər daxilində və ya həyətyanı sahələrdə internet siqnalının zəif olmasıdır:
“Bu problem əsasən modemlərin yerləşdirilməsindən və istifadə olunan avadanlıqlardan qaynaqlanır. Problemin həlli üçün istifadəçilərə əlavə ötürücü avadanlıqların quraşdırılması və Wi-Fi şəbəkəsinin 5 GHz bantında konfiqurasiyası tövsiyə edilir. Bu mövzuda həm şifahi, həm də videotəlimatlar təqdim olunur ki, istifadəçilər texniki problemləri daha asan həll edə bilsinlər. Onu da deyim ki, Biznes Mühiti və Beynəlxalq Reytinqlər üzrə Komissiya sözügedən istiqamətdə mühüm addımlar atır. Bu baxımdan qurumun İnternetə qoşulma və internet infrastrukturu işçi qrupu müstəsna rol oynayır. İşçi qrup Azərbaycanın rəqəmsal inkişafı, internet proseslərinin yerinə yetirilməsi, problemlərin həlli istiqamətində faydalı çalışmalar həyata keçirir. Bu sektorda gedən proseslər daim diqqətdə saxlanılır”.
Sonda o vurğulayıb ki, bu yanaşmalar Azərbaycan telekommunikasiya sektorunda genişzolaqlı internet xidmətlərinin keyfiyyətini artırmaqla yanaşı, abunəçilərin məmnuniyyətini təmin etməyə də xidmət edir.
Aytac Şirinzadə
09:27 17.01.2025
Oxunuş sayı: 16331
