Mədinə Gülgün: Mübariz xalqın mübariz şairəsi
Azərbaycan ədəbiyyatının unudulmaz simalarından biri olan Mədinə Gülgün, istedadı, mübariz ruhu və xalqına olan sarsılmaz sevgisi ilə tarixə iz salmışdır. Ömrü boyu yaşadığı ağrılar, itkilər və çətinliklər onun yaradıcılığını daha da zənginləşdirmiş, qələmindən süzülən hər misra onun qəlbindəki yanğının və xalqına bəslədiyi dərin məhəbbətin güzgüsünə çevrilmişdir. Göz açdığı hər səhər və qələmə aldığı hər söz yalnız Azərbaycan xalqının taleyi, azadlıq mübarizəsi və ədalət uğrundakı arzularının bir ifadəsi idi. Bu gün onun doğum günü, təkcə bir şairənin deyil, həm də xalqı və vətəni üçün daim mübarizə aparan bir fədainin anım günüdür.
Mədinə Gülgün 1926-cı il yanvarın 17-də Bakıda fəhlə ailəsində anadan olmuş, elə burada da ibtidai məktəbi bitirmişdir. 1938-ci ildə ailəliklə Cənubi Azərbaycanın Ərdəbil şəhərinə köçüblər. Təbriz şəhərində yaşamış, əmək fəaliyyətinə burada toxuculuq karxanasında başlamışdır. O, həyatı dərk etməyə başladığı andan Azərbaycan xalqının milli hüquqlarının pozulduğunun əyani şahidi olu və dərk edir ki, mübarizə aparmaq üçün kifayət qədər savadlı və bilikli olmaq lazımdır. Odur ki, qısa müddətdə ərəb qrafikasını və fars dilini öyrənir. Sonralar "Azərbaycan" qəzetinin redaksiyasında xüsusi müxbir vəzifəsində işləmiş Mədinə Gülgün 1945–1946-cı illər Cənubi Azərbaycan Milli Azadlıq Hərəkatının fəal iştirakçısı və öz mübariz şeirləri ilə ömrü boyu həmin inqilabın carçısı olmuşdur. O, 1948-ci ildə Azərbaycan Dövlət Pedaqoji Universitetinin Dil və ədəbiyyat fakültəsinə daxil olub və 1952-ci ildə həmin fakültədən məzunu olub.
Şairin Bakıda və Moskvada "Təbrizin baharı" (1950), Savalanın ətəklərində (1950); Sülhün səsi (1951); Yadigar üzük (1953); Təbriz qızı (1956); Firudin (poema) (1963); Dünyamızın sabahı (1974); və onlarla diğər şeir kitabı dərc olunmuşdur. Bu kitabların başlıca mövzusu insan, azadlıq, Təbriz həsrəti, insanlara canı yanan bir ana qəlbinin arzu və istəkləridir. Onun lirik şeirlərinə mahnılar bəstələnmişdir.
Mədinə Gülgün Azərbaycan SSR Ali Soveti Rəyasət Heyətinin fəxri fərmanları (1960, 1974, 1986), "Şərəf nişanı" ordeni (1980), "21 Azər" (1946), "Əmək veteranı" və digər medallarla təltif olunmuşdur. Azərbaycan SSR əməkdar incəsənət xadimi fəxri adına layiq görülmüşdür.
Mədinə Gülgün yalnız ədəbiyyatda deyil, həm də xalqının milli mübarizə tarixində dərin iz qoymuş nadir şəxsiyyətlərdən biridir. Onun yaradıcılığı azadlıq həsrəti, Vətən sevgisi və insanlığa olan inamın parlaq təcəssümüdür. Ömrünü xalqının rifahına və milli dəyərlərinin qorunmasına həsr edən bu böyük şairə, nəinki öz dövründə, hətta bu gün də Azərbaycanın mənəvi sərvəti olaraq yaddaşlarda yaşayır. Mədinə Gülgünün adı, qələmə aldığı əsərləri kimi, zaman ötsə də, heç vaxt unudulmayacaq.
Ayhan Ağarzayev
07:05 17.01.2025
Oxunuş sayı: 2234
