TÜRKPA Baş katibi: Azərbaycan və Türkiyə arasında strateji müttəfiqlik münasibətləri daha da inkişaf etməlidir
Azərbaycan və Türkiyə arasında strateji müttəfiqlik münasibətlərinin inkişafı hər iki ölkənin beynəlxalq mövqelərinin möhkəmlənməsində mühüm rol oynayır.
Crossmedia.az xəbər verir ki, bunu, Türk Dövlətləri Parlament Assambleyasının (TÜRKPA) Baş katibi Ramil Həsən Türkiyəyə rəsmi səfəri çərçivəsində Türk Dövlətləri Təşkilatının (TDT) Ağsaqqallar Şurasının sədri, Türkiyə Respublikasının keçmiş Baş naziri Binəli Yıldırım ilə görüşü zamanı bildirib.
O, Azərbaycan və Türkiyənin müstəqil siyasi xəttinin davam etdirilməsinin, ortaq maraqlarının uzlaşdırılmasının və strateji əməkdaşlığının genişləndirilməsinin əhəmiyyətini vurğulayıb.
Baş katib qeyd edib ki, iki ölkə arasında müttəfiqlik münasibətləri onların beynəlxalq arenadakı mövqelərinin daha da güclənməsinə xidmət edir.
Ramil Həsən Azərbaycan və Türkiyənin digər qardaş türk dövlətləri üçün ilham mənbəyi olduğunu və Türk dünyasında aparıcı qüvvə rolunu oynadığını da diqqətə çatdırıb.
10:18 28.10.2026
Oxunuş sayı: 62
