Ukrayna döyüş təyyarələrində də “Starlink”dən istifadə edir
Ukrayna Silahlı Qüvvələrinin taktiki aviasiyası etibarlı rabitə və peyk interneti üçün “Starlink” sistemindən istifadə edir.
Crossmedia.az xəbər verir ki, “RBK-Ukrayna” nəşri bu barədə məlumat yayıb.
Ukrayna Hərbi Hava Qüvvələri Komandanlığının Kommunikasiyalar İdarəsinin rəhbəri Yuri İqnat nəşrin “ЭТО БАЗА” podkastında bildirib ki, “Starlink” texnologiyası taktiki aviasiyada da tətbiq olunur.
“Taktiki aviasiya da etibarlı rabitə və peyk interneti üçün “Starlink”dən istifadə edə bilər və ya artıq istifadə edir. Bütün detalları açıqlamaq istəmirəm”, – deyə İqnat vurğulayıb.
Bu, Ukrayna Hərbi Hava Qüvvələrinin rəsmi nümayəndəsinin taktiki aviasiyada “Starlink” texnologiyasının istifadəsi barədə ilk açıq açıqlaması kimi təqdim olunur.
Onun sözlərinə görə, sistem Ukrayna hərbi helikopterlərinin Rusiya pilotsuz uçuş aparatlarını (PUA) zərərsizləşdirməsində də mühüm rol oynayır.
“Starlink” helikopter ekipajları ilə yerdəki döyüş idarəetmə zabitləri arasında sabit məlumat mübadiləsini təmin edir. Bu isə ekipajların hava hədəflərinə yönləndirilməsini asanlaşdırır.
İqnat bildirib ki, peyk rabitəsi reaktiv mühərrikli dron-ələkeçiricilərdə də istifadə olunur. Lakin yüksək sürətlə hərəkət edən aparatlarda “Starlink” xidmətinə məhdudiyyət qoyulması bu texnologiyadan istifadəni çətinləşdirə və ya mümkünsüz edə bilər.
Ukraynalı hərbi rəsmiyə görə, “Starlink” və “Starshield” kimi sistemlər ölkənin hava məkanının qorunması və hava hücumlarının qarşısının alınması baxımından əhəmiyyətlidir.
12:34 26.10.2026
Oxunuş sayı: 54
