Səudiyyə Ərəbistanında neft kəmərinə zərbə endirilib
Səudiyyə Ərəbistanının əsas neft kəməri sistemlərindən birinə cümə axşamı mərmilərlə zərbə endirilib, nəticədə nasos stansiyalarında yanğınlar baş verib.
Crossmedia.az xəbər verir ki, bu barədə CNN iki ABŞ rəsmisinə istinadən məlumat yayıb. İlkin ABŞ qiymətləndirməsinə görə, “East-West” neft kəmərinin yaxınlığında yerləşən nasos stansiyaları vurulub. Peyk görüntülərində stansiyalardan birində genişmiqyaslı yanğın izləri, digərində isə qalın qara tüstünün yayıldığı yanğın müşahidə olunub.
ABŞ rəsmilərindən biri bildirib ki, kəmərə İraqdan buraxılan pilotsuz uçuş aparatları ilə zərbə endirilib. Lakin hücumun arxasında kimin dayandığı və kəmərin özünün fiziki zərər görüb-görmədiyi hələ məlum deyil.
Səudiyyə Ərəbistanı hakimiyyəti isə kəmərin vurulması və ya zədələnməsi ilə bağlı hər hansı təsdiq verməyib.
“East-West” kəməri xam nefti ölkənin şərqindəki neft hasilatı bölgəsindən Qırmızı dəniz sahilində yerləşən Yanbu limanına daşıyır. Bu marşrut Səudiyyə Ərəbistanına neft ixracını Hörmüz boğazından yan keçməklə həyata keçirməyə imkan verir.
23:36 11.09.2026
Oxunuş sayı: 228
