NASA-nın 2004-cü ildə orbitə çıxardığı Neil Gehrels Swift kosmik rəsədxanasının Yerə düşməsinə təxminən 1-2 ay qalıb.
Crossmedia.az xəbər verir ki, NASA bu barədə məlumat yayıb.
Mütəxəssislər uğursuz xilasetmə cəhdindən sonra rəsədxananın üç elmi cihazından ikisinin fəaliyyətini bərpa ediblər. Ultrabənövşəyi-optik və rentgen teleskopları fevral ayında atmosfer müqavimətini azaltmaq məqsədilə söndürülmüşdü. Qamma şüalanmalarını aşkarlayan üçüncü cihazın isə yaxın həftələrdə işə salınması planlaşdırılır.
Swift rəsədxanası qamma-partlayışlarının sonrakı parıltılarını ilk qeydə alan, qravitasiya dalğalarının mənbələrinin müəyyənləşdirilməsinə kömək edən və kosmosdakı mühüm hadisələri araşdırmaq üçün digər teleskopları operativ şəkildə istiqamətləndirən əsas cihazlardan biri olub.
Rəsədxananın öz hündürlük korreksiyası mühərrikinin olmaması onun vəziyyətini daha da çətinləşdirib. Günəş aktivliyinin artması Yer atmosferinin yuxarı qatlarının genişlənməsinə, nəticədə atmosfer müqavimətinin və cihazın orbitdən enmə sürətinin artmasına səbəb olub.
NASA-nın sifarişi ilə 2025-ci ilin sentyabrında Kataly space tərəfindən hazırlanmış LINK aparatı da Swift-i daha yüksək orbitə çıxara bilməyib. Səbəb kimi cihazın istiqamətinin idarə olunması ilə bağlı çətinliklər göstərilib.
Rəsədxana 300 kilometrdən aşağı hündürlüyə endikdən sonra onun idarə olunması xeyli çətinləşəcək. Həmin vaxta qədər Swift kainatı müşahidə etməyə və mümkün qədər çox elmi məlumat toplamağa davam edəcək.
