NATO Fransada 2027-ci il seçkilərindən sonra mümkün kurs dəyişikliyinə hazırlaşır
NATO Fransada 2027-ci ildə keçiriləcək prezident seçkilərinin ölkənin alyans daxilindəki siyasətinə təsir göstərə biləcəyi ilə bağlı müxtəlif ssenariləri nəzərdən keçirir.
Crossmedia.az xəbər verir ki, “Politico” bu barədə məlumat yayıb.
Nəşrin “NATO-nun növbəti kabusu” başlıqlı materialında qeyd olunur ki, müttəfiqlərin narahatlığı əsasən Emmanuel Makronun növbəti prezident seçkilərində namizəd ola bilməməsi ilə bağlıdır.
“Politico” mümkün namizədlər arasında “Milli Birlik” partiyasının lideri Marin Le Penin adını çəkib. Le Pen daha əvvəl Fransanın NATO-nun vahid hərbi komandanlığından çıxmasını və ölkənin Ukrayna münaqişəsinə dair mövqeyinə yenidən baxılmasını müdafiə edib.
Nəşr digər mümkün variant kimi Jan-Lük Melenşonu göstərib. Onun NATO-dan çıxmaq kimi daha radikal addımı nəzərdən keçirdiyi qeyd olunur.
Fransanın NATO üçün xüsusi əhəmiyyəti isə ölkənin Avropa İttifaqının yeganə nüvə dövlətinə çevrilməsi ilə əlaqələndirilir. “Politico”nun həmsöhbətlərinə görə, Parisin alyans strukturlarında iştirakının zəifləməsi NATO-nun Şərqi Avropadakı fəaliyyətini və nüvə əməkdaşlığını çətinləşdirə bilər.
15:51 24.08.2026
Oxunuş sayı: 50
