Dörd uşağı 7 ilə yaxın yük maşınının kabinəsində saxladılar – dəhşətli faktlar üzə çıxdı
ABŞ-də dörd uşağın illərlə yük maşınının kabinəsində ağır şəraitdə saxlanılması ilə bağlı dəhşətli hadisənin təfərrüatları üzə çıxıb.
Crossmedia.az xəbər verir ki, “New York Post” bu barədə məlumat yayıb.
Məhkəmə sənədlərinə əsasən, 51 yaşlı Keyşa Epps və 37 yaşlı Tamra Marşon Stüart 2019-cu ilin dekabrından etibarən dörd uşaqla birlikdə Mayami və Atlanta arasında hərəkət edən yük maşınının kabinəsində yaşayıblar.
Uşaqların böyük hissəsi vaxt kabinədən çıxa bilməyib, tualetdən istifadə etmək, duş qəbul etmək və çöldə oynamaq imkanından məhrum olublar. Onların dördü də eyni çarpayıda yatıb, kifayət qədər qida ilə təmin edilməyib.
Məlumata görə, uşaqlar təxminən beş il məktəbə getməyib və demək olar ki, tibbi yardım almayıblar. İstintaqın məlumatına görə, uzun müddət dar məkanda qalmaq onların fiziki vəziyyətinə mənfi təsir göstərib.
Epps və Stüarta uşaqlarla düzgün rəftar etməmə ilə bağlı hər bir uşaq üzrə olmaqla ümumilikdə dörd ittiham irəli sürülüb. Bundan başqa, Stüart yetkinlik yaşına çatmayanlara qarşı cinsi zorakılıqda şübhəli bilinir.
İstintaqın versiyasına görə, uşaqlar baş verənlərlə bağlı Eppsdən kömək istəyiblər. Lakin qadın onların dediklərinə inanmayıb və uşaqları Stüartla birlikdə saxlamağa davam edib.
Şübhəlilər avqustun 6-da həbs olunub və həmin vaxtdan Dyuval dairəsinin həbsxanasında saxlanılırlar.
13:41 24.08.2026
Oxunuş sayı: 47
