Müharibənin səssiz qurbanları: Qara dənizdə minlərlə quş məhv olur
Rusiya-Ukrayna müharibəsinin təsirləri təkcə insanlarla məhdudlaşmır. Partlayışlar, raket zərbələri və pilotsuz uçuş aparatlarının yaratdığı güclü səs-küy Qara dəniz bölgəsində quşların həyatına ciddi zərər vurur.
Crossmedia.az xarici mediaya istinadən xəbər verir ki, "Tuzlovski limanları" Milli Təbiət Parkının elmi-tədqiqat şöbəsinin rəhbəri, biologiya elmləri doktoru İvan Rusev bildirib ki, müharibə nəticəsində minlərlə quş tələf olub, nadir çəhrayı flaminqolar isə iki ildir normal şəkildə nəsil artıra bilmir.
Alimin sözlərinə görə, xüsusilə liman ekosistemləri böyük təhlükə ilə üzləşib. Milli parkın ərazisində yerləşən 13 limanda raket zərbələri və dronların düşməsi quşlara dağıdıcı təsir göstərib.
"Raket zərbələrindən sonra minlərlə quşun eyni anda məhv olduğu sənədləşdirilmiş hallar var", - deyə Rusev bildirib.
Xüsusi narahatlıq doğuran məsələlərdən biri isə çəhrayı flaminqoların vəziyyətidir. Bu nadir quşlar genişmiqyaslı müharibədən əvvəl "Tuzlovski limanları" ərazisində məskunlaşmışdı.
2023-cü ildə flaminqo koloniyası uğurla təxminən 200 bala çıxarmışdı. Alimlər onların 18 balasına halqa yerləşdirərək miqrasiya yollarını da izləyə bilmişdilər.
Lakin 2024 və 2025-ci illərdə vəziyyət kəskin pisləşib. Güclü partlayış səsləri və "Şahid" tipli dronların uçuşları quşları qorxudub, onlar yuvalarını və yumurtalarını tərk etməyə başlayıblar.
Mütəxəssisin sözlərinə görə, bu il flaminqolar yenidən koloniya yaratmağa çalışırlar, lakin döyüşlər onların uğurunu təhlükə altında saxlayır.
Bundan başqa, müharibə köçəri quşların miqrasiya marşrutlarını da dəyişir. "Tuzlovski limanları" Afrikadan tundraya gedən əsas köç yollarından birinin üzərində yerləşir və bir çox quş növləri burada dincəlir, enerji toplayır.
Lakin partlayışlar və davamlı səs-küy quşları istiqamətlərini dəyişməyə məcbur edir. Alimlər bildirirlər ki, marşrut dəyişikliyi quşların enerji itkisinə, yuvalama yerlərinə çata bilməməsinə və populyasiyaların azalmasına səbəb olur.
Hazırda ekoloqlar müharibənin quş növlərinin sayına real təsirini müəyyənləşdirmək üçün məlumatlar toplayırlar. Onlar bildirirlər ki, əsas məqsədlərdən biri təbiətə vurulan zərərin miqyasını sənədləşdirməkdir.
02:38 13.07.2026
Oxunuş sayı: 57
