Aİ dekabr iclasına Mirzoyanı dəvət etdi – Ermənistanın dayanıqlığı və seçkilər gündəmdə
Avropa İttifaqının xarici işlər üzrə ali nümayəndəsi Kaja Kallas bildirib ki, dekabrda keçiriləcək Aİ xarici işlər nazirlərinin toplantısına Ermənistanın XİN rəhbəri Ararat Mirzoyan dəvət olunub. İclasda Ermənistanın dayanıqlığının gücləndirilməsi və seçkilərlə bağlı mövzular müzakirə ediləcək.
Crossmedia.az bildirir ki, Kallas Brüsseldə baş tutan Ermənistan–Aİ Tərəfdaşlıq Şurasının 6-cı iclasından sonra keçirilən mətbuat konfransında çıxış edərək 2025-ci ilin Aİ–Ermənistan münasibətləri üçün əhəmiyyətli olduğunu vurğulayıb. O, 8 avqust razılaşmalarının Azərbaycan və Ermənistan arasında uzun illər davam edən münaqişəni başa vurduğunu qeyd edib və Aİ-nin bu prosesə dəstəyinin davam edəcəyini söyləyib.
Kallas əlavə edib ki, Aİ Ermənistanın sülh və dayanıqlığının artırılması üçün 15 milyon avro ayırıb və bu istiqamətdə bir sıra layihələr həyata keçiriləcək. Onun sözlərinə görə, ölkə parlament seçkiləri ərəfəsində Rusiyanın və onun proksi qüvvələrinin dezinformasiya hücumları ilə üzləşir. Aİ-nin maliyyə dəstəyi bu xarici təsirlərin aşkar edilməsinə və onlara qarşı mübarizəyə xidmət edəcək.
16:44 02.12.2025
Oxunuş sayı: 835
