ABŞ Ukraynaya “28 maddəlik plan”la yanaşı təhlükəsizlik zəmanətləri sənədi də təqdim edib
ABŞ administrasiyası Ukraynaya yalnız “28 maddəlik plan”ı deyil, həm də təhlükəsizlik zəmanətlərini əks etdirən ayrıca bir sənəd təqdim edib.
Crossmedia.az RBK Ukrayna-yə istinadən xəbər verir ki, 19 noyabrda ABŞ nümayəndə heyətinin Kiyevə səfəri zamanı Ukrayna tərəfinə iki mühüm layihə sənədi təqdim olunub: “28 maddəlik plan” və “Ukrayna üçün Təhlükəsizlik Zəmanətləri haqqında Çərçivə Sazişi”.
Mənbənin bildirdiyinə görə, təhlükəsizlik zəmanətləri haqqında çərçivə sənədi NATO-nun 5-ci maddəsinin prinsipləri əsasında modelləşdirilib və üç əsas bənddən ibarətdir. Sənədə görə, Rusiyanın Ukraynaya yenidən hücumu halında ABŞ prezidenti “silahlı qüvvə, kəşfiyyat və logistika dəstəyi, iqtisadi və diplomatik tədbirlər və digər uyğun hesab edilən addımlardan” istifadə etmək hüququna malik olacaq.
Saziş həmçinin bildirir ki, Fransa, Böyük Britaniya, Almaniya, Polşa və Finlandiya da daxil olmaqla bir sıra NATO üzvləri ABŞ ilə birgə hərəkət etməyi üzərlərinə götürürlər. Çərçivə sənədi on il müddətinə qüvvədə olacaq, lakin tərəflərin razılığı ilə dəyişdirilə və ya uzadıla bilər.
Məlumatda qeyd olunur ki, danışıqlar prosesi davam edir və sənədlərin son versiyası hələ yekunlaşmayıb.
18:57 24.11.2025
Oxunuş sayı: 2804
