Paşinyan: Bir çox ölkələr bizə silah satmaqdan imtina ediblər
Ermənistanın Baş naziri Nikol Paşinyan bildirib ki, uzun illər ərzində bir çox ölkələr İrəvana silah və hərbi texnika satmaqdan imtina edib.
Crossmedia.az xarici mediaya istinadən xəbər verir ki, o, bu barədə Ermənistan dövlət qurumları nümayəndələrinin ilk assambleyasında çıxışı zamanı danışıb.
Paşinyanın sözlərinə görə, imtinaya səbəb həmin ölkələrin silahların Ermənistanın beynəlxalq səviyyədə tanınmış sərhədlərindən kənarda istifadə olunacağına dair narahatlıq olub.
Baş nazir qeyd edib ki, hazırda bu məhdudiyyətlər aradan qalxıb:
Bu gün belə maneələr yoxdur. Çünki xarici siyasətimizin əsasında 1991-ci il Alma-Ata Bəyannaməsi və Ermənistanın beynəlxalq səviyyədə tanınmış ərazisinin müdafiəsi kimi legitim məsələ dayanır.
Paşinyan eyni zamanda bildirib ki, legitimlik təhlükəsizliyi tam təmin etmir, lakin ölkənin həssaslığını azaldır və müasir təhlükəsizlik texnologiyalarına çıxışı genişləndirir.
Legitimlik müharibəyə düşmə ehtimalını azaldır və müdafiə qabiliyyətlərinin dəfələrlə artmasına imkan verir. Heç kim dövlətin beynəlxalq səviyyədə tanınmış ərazi bütövlüyünü müdafiə etmək hüququnu şübhə altına ala bilməz,– deyə Paşinyan əlavə edib.
23:14 23.11.2025
Oxunuş sayı: 3375
