Zəngəzur dəhlizi türk dünyasının gələcəyi üçün strateji əhəmiyyət daşıyır - Binəli Yıldırım
Türk dövlətləri təşkilatının Ağsaqqallar Şurasının sədri Binəli Yıldırım Türkiyənin Səlcuq Universitetində keçirilən simpoziumda çıxışı zamanı bildirib ki, Orta Dəhlizin tərkib hissəsi olan Zəngəzur dəhlizi türk dünyasının inkişafına töhfə verən mühüm amildir.
Bu barədə Crossmedia.az xarici KİV-ə istinadən xəbər verir.
Binəli Yıldırımın sözlərinə görə, Azərbaycanın qərb rayonları ilə Naxçıvan Muxtar Respublikası arasında nəqliyyat yolunun açılması türk dünyasının potensialını üzə çıxaracaq və “bu coğrafiyanın resursları və sərvətləri türk xalqlarının rifahı naminə istifadə olunacaq”.
“Zəngəzur dəhlizi türk dünyasının gələcəyi üçün xüsusi əhəmiyyət daşıyır”, – deyə o vurğulayıb.
Binəli Yıldırım TDT ölkələri arasında ticarət göstəricilərinə də diqqət çəkib. O qeyd edib ki, bu gün türkdilli ölkələrin ümumi xarici ticarət dövriyyəsi 1,1 trilyon dollar təşkil etsə də, öz aralarındakı ticarət cəmi 70 milyard dollardır.
TDT Ağsaqqallar Şurasının sədri 34 hərfdən ibarət olan ümumi türk əlifbasından tam şəkildə istifadə olunmasının vacibliyini də qeyd edib.
“Ümumi türk əlifbası ilə bağlı işçi məqamlar razılaşdırılıb. Bu gün əsas məsələ həmin əlifbanın praktikada tətbiq edilməsidir. Bu isə ayrı-ayrı ölkələrin siyasi iradəsindən və bu əlifbanı tətbiq etmək istəyindən asılıdır. Buna zaman lazımdır”, – deyə Yıldırım bildirib. Onun sözlərinə görə, yeni əlifba sayəsində TDT ölkələrinin sakinləri istənilən türk dilində yazılmış mətnləri rahatlıqla oxuya biləcəklər.
Binəli Yıldırım türk dövlətlərinin inteqrasiya gündəliyində mühüm istiqamətlərdən biri kimi ümumi türk dünyası tarixinin dərsliklərinin hazırlanması, gömrük prosedurlarının sadələşdirilməsi və infrastrukturun inkişafı kimi məsələləri də qeyd edib.
Türkanə Məşədiyeva
14:47 22.11.2025
Oxunuş sayı: 2672
