ABŞ Avropa və Ukraynaya Trampın planını qəbul etdirmək üçün təzyiq göstərir
ABŞ nümayəndə heyəti 21 noyabrda Kiyevdə Avropa rəsmiləri ilə görüşdə Trampın sülh planını qəbul etdirmək üçün ciddi təzyiq göstərib. Görüşdə amerikalılar bildiriblər ki, plan "demək olar ki, müzakirə olunmur" və Vaşinqton detallara minimal çevikliklə yanaşacaq.
Crossmedia.az xarici mediaya istinadən xəbər verir ki, görüşdə iştirak edən ABŞ-nin Ukraynadakı müvəqqəti işlər vəkili Culi Deyvis Avropa rəsmilərinə bildirib ki, Ukraynanın müharibəni davam etdirməsini nə qədər dəstəkləsələr də, bunun bir həddi var və Rusiya güclü sənaye bazasına sahibdir. General Driskoll isə açıq şəkildə bildirib: "Bu biabırçılığı bitirmək lazımdır" və Ukraynanın vəziyyətinin çox pis olduğunu vurğulayıb.
Deyvis və Driskoll Zelenskidən razılaşmanı cümə axşamına qədər imzalamasını tələb ediblər. ABŞ nümayəndələri bildirib ki, təhlükəsizlik təminatları planın bir hissəsi olacaq və yaxın günlərdə Avropa və Ukrayna ilə müzakirə olunacaq.
Görüşdə iştirak edən Avropa İttifaqı səfirləri ABŞ-nin mövqeyini "şok edici" adlandırsalar da, amerikalı mənbələr toplantının “müsbət, açıq və hörmət çərçivəsində” keçdiyini qeyd ediblər.
Avropa diplomatları isə ABŞ-nin Zelenskinin siyasi zəifliyindən istifadə edərək Kiyevə razılaşmanı qəbul etdirməyə çalışdığını və təklifin Rusiyanın strateji qələbəsi olduğunu bildirib. Deyvis isə Rusiyanın milyonlarla hərbçi itkisini qələbə hesab etməyib.
Görüşün sonunda Avropa nümayəndələri razılaşma əvəzinə hazırda Rusiyaya təzyiqi artırmağın vacib olduğunu bildirib, ABŞ tərəfi isə Trampın planını "Ukraynanın ümid edə biləcəyi ən yaxşı variant" olaraq qiymətləndirib.
Nigar Yahyazadə
14:41 22.11.2025
Oxunuş sayı: 2934
