Kobaxidze: Gürcüstanın Avropa yolunun şərti milli və xristian kimliyidir
Kobaxidzenin sözlərinə görə, gürcü xalqı tarixi boyunca milli və xristian kimliyini qoruyub və Avropa ilə inteqrasiya da yalnız bu dəyərlər çərçivəsində mümkündür:
“Avropaya inteqrasiya bizim üçün yalnız o zaman dəyər kəsb edir ki, bizi qarşılayan Avropa da xristian və möhkəm kimliyə sahib olsun.”
Crossmedia.az bu barədə Gürcüstan mediasına istinadən xəbər verir. Məlumata görə, Baş nazir həmçinin Gürcüstanın geostrateji mövqeyinə diqqət çəkib. O bildirib ki, hazırkı qlobal gərginlik fonunda Aİ-nin Şərqə çıxışı və iqtisadi inkişafı üçün ən effektiv yol məhz Gürcüstandan keçir.
Kobaxidze Avropa İttifaqının qlobal iqtisadi payının azalmasına da toxunub:
“Aİ-nin dünya iqtisadiyyatındakı payı 30%-dən 17,5%-ə düşüb və tendensiyalar göstərir ki, azalma davam edəcək.”
Baş nazir həmçinin Gürcüstanın Çinlə əməkdaşlığı dərinləşdirmə qərarının səbəblərini açıqlayıb. Onun sözlərinə görə, Çin uzun illərdir müharibələrdən uzaq duran yeganə böyük dövlətdir və öz dəyərləri əsasında digər ölkələrlə münasibət qurur:
“Çin demək olar ki, yarım əsrdir heç bir müharibədə iştirak etməyən yeganə supergücdür. Bu, çox önəmli dəyərdir və biz əməkdaşlığı buna görə genişləndirdik.”
Günel Verdiyeva
14:20 22.11.2025
Oxunuş sayı: 2724
