Tramp administrasiyasının Ukrayna üzrə “sülh planı” ilə bağlı yeni detallar açıqlanıb
ABŞ Prezidenti Donald Trampın administrasiyası Ukraynanın şərqi Donbas bölgəsinə nəzarəti güzəştə gedəcəyi, lakin həmin ərazilərin qanuni mülkiyyətini saxlayacağı bir razılaşma modeli üzərində çalışır. Məlumatı The Telegraph və digər Qərb mediası yayıb.
Crossmedia.az xarici KİV-ə istinadən xəbər verir ki, plan çərçivəsində Donbasın Rusiyanın faktiki idarəsinə verilməsi nəzərdə tutulur. Məlumatlı mənbələrin sözlərinə görə, Moskva bölgəyə nəzarətə görə açıqlanmayan məbləğdə “kirayə haqqı” ödəyəcək.
Sky News yazır ki, Trampın xüsusi elçisi Rob Vitkoff sülh planına dair məlumatların mediaya sızdırıldığını düşünür. Kanalın iddiasına görə, siyasətçi şəxsi mesaj kimi göndərmək istədiyi məlumatı səhvən X platformasında paylaşıb və daha sonra silib.
Axios-un əldə etdiyi sənədlərdə isə planın əlavə detallarına yer verilir. Məlumata əsasən, Donbasın Ukrayna tərəfindən boşaldılmalı olan hissəsi gələcəkdə silahsızlaşdırılmış zona kimi müəyyən ediləcək və Rusiya həmin əraziyə qoşun yerləşdirə bilməyəcək.
Həmçinin plan bəzi cənub bölgələrinin – xüsusilə Xerson və Zaporojyedəki mübahisəli ərazilərin – hazırkı cəbhə xətti əsasında tənzimlənməsini nəzərdə tutur. Sənədə görə, Moskva danışıqların nəticəsindən asılı olaraq bəzi əraziləri geri qaytara bilər.
Analitiklər bildirirlər ki, Tramp administrasiyasının təklif etdiyi model həm Ukrayna, həm də Rusiya tərəfindən böyük müzakirələrə səbəb olacaq və yaxın dövrdə prosesə dair daha ətraflı açıqlamaların verilməsi gözlənilir.
20:18 20.11.2025
Oxunuş sayı: 1071
