Xarici xəbərlər

Trampın tarifləri Yaponiyanın iqtisadiyyatını 1,8% daraldıb

Yaponiyanın iqtisadiyyatı 2025-ci ilin üçüncü rübündə 1,8 faiz kiçilib. Crossmedia.az xəbər verir ki, bu barədə Associated Press məlumat yayıb.

Hesabata görə, daralmanın əsas səbəbi ABŞ Prezidenti Donald Tramp tərəfindən Yaponiyadan ixraca tətbiq edilən gömrük tarifləri və mənzil sektorunda özəl investisiyaların kəskin azalmasıdır. İyul–sentyabr aylarında ixrac illik ifadədə 4,5 faiz azalıb, idxal isə 0,1 faiz geriləyib.

Mənzil investisiyaları əvvəlki rüblə müqayisədə 9,4 faiz, illik ifadədə isə 32,5 faiz azalıb. AP qeyd edir ki, tariflər ixraca güclü şəkildə bağlı olan Yaponiyanın iqtisadiyyatına ciddi təsir göstərir. Buna baxmayaraq, bir çox yapon avtomobil istehsalçıları tariflərin təsirindən yayınmaq üçün istehsallarını xaricə köçürməyə başlayıblar.

Yeni Baş nazir Sanae Takaichi iqtisadiyyatı canlandırmaq üçün dövlət xərclərini artırmağı planlaşdırır. Analitiklər bunun Mərkəzi Bankın inflyasiyanı cilovlamaq cəhdlərini çətinləşdirə biləcəyini bildirirlər.

Oktyabrın əvvəlində iqtisadi azalmanın 1,2 faiz olacağı proqnozlaşdırılsa da, nəticələr daha kəskin düşüş göstərib.

Nəzrin Abbas

🖨 Çap et

17:15 17.11.2025

Oxunuş sayı: 1060