Levon Koçaryan 2026 seçkilərində tərtib olunan siyahının lideri ola bilər
Ermənistanın sabiq prezidenti Robert Koçaryan 2026-cı ildə keçiriləcək parlament seçkilərində oğlu, “Ermənistan” fraksiyasının deputatı Levon Koçaryanı partiya siyahısının ilk sırasına çıxarmağı nəzərdə tutur.
Bu barədə Crossmedia.az “Qraparak” qəzetinin eks-prezidentin komandasındakı mənbələrə istinadən verdiyi məlumata əsasən xəbər verir.
Məlumata görə, Levon Koçaryan son aylarda ölkənin müxtəlif bölgələrinə səfərlər edərək seçicilərlə fəal görüşlər keçirir.
Mənbələr bildirir ki, 2021-ci ildəki ssenarinin – siyahıya Robert Koçaryanın rəhbərlik etməsi və Levon Koçaryanın isə aşağı sıralarda yer almasının – bu dəfə təkrarlanması mümkün görünmür. Hazırkı reytinq göstəriciləri nəzərə alınaraq atanın və oğulun siyahının ilk onluğunda eyni anda yer almasının uyğun olmadığı qeyd olunur.
“Qraparak” xatırladıb ki, Robert Koçaryan son mətbuat konfransında seçki siyahısının tərkibinin sosioloji araşdırmaların nəticələrindən asılı olacağını bildirmişdi. Onun sözlərinə görə, hansı namizədin daha yüksək dəstək topladığı barədə məlumat yanvar–fevral aylarında dəqiqləşəcək.
Eks-prezident 7 oktyabrda komandasının qarşıdakı parlament seçkilərində iştirak edəcəyini açıqlamışdı.
Mehriban İbrahimli
18:55 05.11.2025
Oxunuş sayı: 1180
