Ukraynaya mavi qazın verilməsi Azərbaycan qaz ixracatının şaxələndirilməsidir - Deputat
Ukrayna Azərbaycanla qaz təchizatı üzrə uzunmüddətli müqavilənin bağlanmasına dair danışıqlar aparır. Bu barədə Ukraynanın Azərbaycandakı səfiri Yuri Qusev məlumat verib. Onun sözlərinə görə, iki ölkə arasında enerji sektorunda əməkdaşlığın daha da gücləndirilməsi istiqamətində işlər görülür. Səfir həmçinin Transbalkan dəhlizi vasitəsilə Azərbaycan qazının tədarükünə dair ilk müqavilənin imzalandığını xatırladaraq, enerji, humanitar, ticarət və təhsil sahələrində əlaqələrin inkişaf etdiriləcəyinə ümid etdiyini bildirib.
Mövzu ilə bağlı Milli Məclisin deputatı Vüqar Bayramov Crossmedia.az- açıqlama verib: “Azərbaycan Ukraynanın ərazi bütövlüyünə və suverenliyinə hörmətlə yanaşır və bu istiqamətdə öz mövqeyini daim bəyan edib. Rusiya-Ukrayna müharibəsi başladıqdan sonra iki ölkə arasında, təbii ki, əməkdaşlıq imkanları hər zaman araşdırılıb. Bütövlükdə, müharibə başladıqdan sonra Azərbaycan Ukraynaya 45 milyon dollardan artıq humanitar yardım göstərib. Fərqli istiqamətlərdə humanitar dəstək davam etdirilib. Təbii ki, Ukraynaya mavi qazın verilməsi Azərbaycan qaz ixracatının şaxələndirilməsi baxımından da vacib hesab olunur. Çünki bir tərəfdən Azərbaycan mavi qazı artıq Mərkəzi və Şərqi Avropaya ixrac edir”.
Deputat qeyd edib ki, bu o deməkdir ki, digər ölkələr, o cümlədən Ukraynanın da mavi qaz almaq imkanları var: “Bu baxımdan təbii ki, belə bir əməkdaşlığın qurulması real ola bilər. İstisna deyil ki, iki ölkə arasında bu istiqamətdə əməkdaşlıq qurulsun. Təbii ki, Azərbaycan üçün qaz ixracatının şaxələndirilməsi vacibdir. Əlbəttə, daha çox mavi qaz ixracı daha çox gəlir deməkdir. Ukrayna üçün isə bu, enerji təhlükəsizliyinin formalaşması və yeni cəbhədə iqtisadiyyatın qurulması baxımından vacibdir. Ümumiyyətlə, hazırda Azərbaycan Avropaya qaz ixracında ilk beşlikdə yer alır. Azərbaycan tərəfindən Avropaya mavi qaz ixracında artımlar müşahidə olunur. Bu da onu göstərir ki, Azərbaycan növbəti dövrlərdə daha çox ölkəyə, daha çox mavi qaz nəql edə biləcək”.
Zeynəb Xuduyeva
15:59 05.11.2025
Oxunuş sayı: 2613
