Pakistan ordusu Əfqanıstanla sərhəddə 300-dən çox silahlını məhv edib
Pakistan ordusu Əfqanıstanla sərhəddə aparılan son əməliyyatlar zamanı 200-dən çox “Taliban” silahlısını zərərsizləşdirib.
Crossmedia.az xarici mediaya istinadən xəbər verir ki, bu barədə Pakistan Ordusunun İctimaiyyətlə Əlaqələr Xidmətinin (ISPR) baş direktoru, general-leytenant Əhməd Şərif Çaudhri məlumat verib. Onun sözlərinə görə, əməliyyatlar nəticəsində 206 nəfər Əfqan “Taliban” üzvü və 112 nəfər “Fitna əl-Xavaric” qrupunun döyüşçüsü məhv edilib.
Çaudhri bildirib ki, Pakistan ordusu transsərhəd təhdidlərə dərhal və qəti şəkildə reaksiya verib, ölkənin sərhədləri isə tam şəkildə qorunur. Əksər əməliyyatların Belucistan vilayətində həyata keçirildiyi qeyd olunub, çünki son dövrlər bu bölgədə silahlı qrupların fəallığı artıb.
ISPR rəhbəri əlavə edib ki, “Tehrik-i-Taliban Pakistan” (TTP) təşkilatı Əfqan “Taliban”ının əmirinə sədaqət andı içib və artıq onun filialı kimi fəaliyyət göstərir.
Bundan başqa, general Çaudhri Hindistanı “saxta bayraq” (false flag) əməliyyatı hazırlamaqda ittiham edib. Onun sözlərinə görə, Hindistanın növbəti təxribat cəhdi Pakistana qarşı yönəlib:
“Hindistan istədiyini quru, dəniz və hava sahəsində edə bilər, lakin bu dəfə cavab əvvəlkindən daha sərt olacaq,” – deyə o bildirib.
Pakistan ordusunun nümayəndəsi vurğulayıb ki, Əfqanıstanla sərhəddəki əməliyyatlar sürətli və dəqiq şəkildə həyata keçirilib.
“Biz Əfqanıstanla bütün məsələləri dinc yolla həll etməyə çalışırıq. Pakistanın yeganə məqsədi – Əfqanıstan ərazisinin bizə qarşı istifadə edilməməsidir,” – general qeyd edib.
18:55 03.11.2025
Oxunuş sayı: 1764
