Azərbaycan və Türkiyə arasındakı münasibətlər artıq geosiyasi birliyə çevrilib - Deputat
Türkiyə və Azərbaycanın qardaşlıq münasibətləri artıq sadəcə dostluq və siyasi əməkdaşlıq çərçivəsini aşaraq, regional və qlobal miqyasda strateji geosiyasi birliyə çevrilib. Bu reallığı Türkiyənin Azərbaycandakı səfiri Birol Akgün də xüsusi vurğulayaraq bildirib ki, "Bir millət, iki dövlət" prinsipi bu gün təkcə ideoloji və mənəvi bağları deyil, həm də vahid siyasi, iqtisadi və təhlükəsizlik məkanını formalaşdıran bir konsepsiyaya çevrilib.
Səfirin sözlərinə görə, Türkiyə-Azərbaycan münasibətləri artıq Xəzərin şərqinə doğru genişlənərək, Türk Dövlətləri Təşkilatı çərçivəsində dərin inteqrasiya mərhələsinə qədəm qoyub. O, regionun dəyişən qlobal düzəndə strateji əhəmiyyətini vurğulayaraq qeyd edib ki, Orta Dəhliz və Zəngəzur dəhlizinin açılması ilə birlikdə Şərq-Qərb nəqliyyat xətti tam formalaşacaq və bu proses növbəti on ildə mühüm iqtisadi və siyasi inkişafların əsasını qoyacaq.
Beləliklə, Türkiyə ilə Azərbaycan arasındakı əlaqələr bu gün tarixi qardaşlıqdan strateji geosiyasi güc mərkəzinə çevrilməkdədir.
Mövzu ilə bağlı Milli Məclisin deputatı Ceyhun Məmmədov Crossmedia.az-la öz fikirlərini bölüşüb:
"Əslində bu, bir reallıqdır və tamamilə doğru fikirdir ki, Azərbaycan və Türkiyə arasındakı münasibətlər artıq geosiyasi birliyə çevrilib. Bu gün dövlətlərimiz arasında əlaqələr o dərəcədə yüksək səviyyədə inkişaf edib ki, artıq tam əminliklə deyə bilərik: Azərbaycan və Türkiyə tarixdə heç zaman olmadığı qədər bir-birinə yaxındır. Bu yaxınlığın əsasını isə ölkə liderlərinin mütəmadi görüşləri, müxtəlif sahələrdə həyata keçirilən sıx əməkdaşlıq və qarşılıqlı etimad təşkil edir".
Deputat, həmçinin bu birliyimiz və qardaşlığımızın bu gün bir çox dünya ölkələri üçün unikal nümunəyə çevrildiyini qeyd edib: "Azərbaycan–Türkiyə münasibətləri təkcə bölgədə deyil, həm də qlobal miqyasda qarşılıqlı dəstək və əməkdaşlığın ən bariz örnəyi kimi dəyərləndirilir. Müasir dövrümüz Türkiyənin yüksəlişi və Türk dünyasının birliyi dövrüdür. Qarşıda bizi daha böyük işlər, daha mühüm nailiyyətlər gözləyir".
Elmir Heydərli
19:33 01.11.2025
Oxunuş sayı: 1932
