Diplomatlar Zəngəzur dəhlizinə Azərbaycan tərəfdən ciddi hazırlıq getdiyinin fərqindədirlər - Deputat
Azərbaycan Prezidentinin köməkçisi, Prezident Admnistrasiyasının Xarici siyasət məsələləri şöbəsinin müdiri Hikmət Hacıyev diplomatik korpus təmsilçiləri ilə birlikdə Cəbrayıl və Zəngilan rayonlarına səfər edib. Hacıyev “X” hesabında paylaşım edərək bildirib ki, bu səfər Prezident İlham Əliyevin yolunu davam etdirmək məqsədi daşıyır və Horovlu kəndi səfərin ilk dayanacağıdır. Hacıyev qeyd edib ki, 2020-ci il Vətən müharibəsindən sonra azad edilmiş ərazilərə diplomatik korpusla birlikdə bu, iyirminci səfərdir.
Mövzu ilə bağlı Crossmedia.az-a açıqlamasında Milli Məclisin deputatı Aydın Mirzəzadə bildirib ki, diplomatların səfəri Azərbaycanın azad edilmiş ərazilərdəki inkişafını dünyaya göstərir: “Azərbaycan ictimai əhəmiyyət daşıyan məlumatlarla bağlı həmişə şəffaf siyasət yeridir. Hikmət Hacıyevin bildirdiyi kimi bu, diplomatların işğaldan azad olunan əraziləri 20-ci səfəridir.
Bu o deməkdir ki, ildə 4 səfər olur və Azərbaycan ilk dəfə torpaqlar işğaldan azad olunandan sonra
erməni işğalının ağır nəticələrini dünyaya subut etdi. Düzdür, diplomatlar onsuz da mətbuatdan, ayrı-ayrı görüşlərdən məlumat əldə edirlər. Ancaq birbaşa yerində görmək, bu tamam başqa bir təəssüratdır. Diplomatlar artıq 20-dən çox yaşayış məntəqəsinə vətəndaşlarımızın qayıtdığının, Zəngəzur dəhlizinə Azərbaycan tərəfdən ciddi hazırlıq getdiyinin fərqindədirlər. Görünən ondan ibarətdir ki, gələn ilin ortalarına artıq Zəngəzur dəhlinin Azərbaycana aid olan hissəsi hazır olacaq. Ermənistanın 42 kilometrlik məsafəsi isə artıq ABŞ və Ermənistan arasında həll olunan məsələdir. Bu məsələdə Azərbaycan hərtərəfi dəstək olmağa hazırdır”.
Parlamentari Azərbaycanın öz gücünü dünyaya necə sübut etdiyindən də danışıb: “Dünya bir daha Azərbaycanın öz gücünə torpaqları işğaldan azad etdiyini, Azərbaycanın öz resursları hesabına yaşayış məntəqələrini, sosial obyektləri, kommunikasiya xətlərini bərpa etdiyini gördü. Azərbaycan xalqının öz torpağına sahib çıxmağını və necə qurucu bir xalq olduğunu bir daha gözləri ilə gördülər”.
Günel Verdiyeva
15:32 01.11.2025
Oxunuş sayı: 1656
