Ermənistanda növbədənkənar parlament seçkilərinə ehtiyac yoxdur
Ermənistan Baş nazirinin aparat rəhbəri Arayik Arutyunyan “Vətəndaş Müqaviləsi” partiyasının seçki qərargahının yaradılması və onun rəhbərlik təyinatı ilə bağlı açıqlamasında bildirib ki, ölkədə növbədənkənar parlament seçkilərinə ehtiyac yoxdur.
Crossmedia.az erməni KİV-lərinə istinadən xəbər verir.
Arutyunyan jurnalistlərə deyib:
“Qərar qəbul olunub ki, növbəti parlament seçkilərinə hazırlıq aparılsın. Əlavə intriqa axtarmağa ehtiyac yoxdur. Hökumət ilk dəfə öz işini düzgün şəkildə, təcili olmadan, seçki qərargahı yaradaraq təşkil etmək istəyir”.
O, növbədənkənar seçkilər üçün şəraitin yarana biləcəyini istisna etməyib və əlavə edib ki, hazırki məlumata görə növbəti parlament seçkiləri Ermənistanda 2026-cı ilin iyun ayında keçiriləcək. Arutyunyan həmçinin siyasi sahənin “təmizlənməsi” və müxalifətin cinayət təqibi ilə neytrallaşdırılması fikirlərinə qoşulmayıb:
“Sarkazm və istehza yerinə düşmür. Biz hüquqi dövlət şəraitində yaşayırıq. Cinayət törətmiş hər kəs, istər müxalifət, istər hakimiyyət nümayəndəsi olsun, layiq olduğu yerdə olur”.
Günel Verdiyeva
17:53 29.10.2025
Oxunuş sayı: 1209
