Deputat: Azərbaycanla Ukrayna arasında enerji sahəsində əməkdaşlıq güclənir
Ukrayna energetika nazirinin müavini Roman Andaraq bildirib ki, Rusiyanın 2022-ci ilin fevralında müharibəyə başlamasından bu günə qədər Azərbaycan Ukraynaya enerji sahəsində ümumilikdə 15 milyon dollar dəyərində humanitar yardım edib.
O qeyd edib ki, bu dövr ərzində Ukraynaya Azərbaycandan yardım qismində dörd partiyada enerji avadanlıqları gətirilib:
"Azərbaycan Ukraynanın etibarlı enerji tərəfdaşı olaraq qalır. Müharibənin başlanmasından dərhal sonra Ukraynaya generatorlar, bir qədər sonra isə transformatorlar, kabellər və digər avadanlıqlar Azərbaycandan göndərildi".
Onun sözlərinə görə, bu yardımların əksəriyyəti Sumı vilayətinə, Şostka şəhərinə göndərilib:
"Biz orada hücumların güclənməsini və Rusiya mülki enerji infrastrukturumuza qarşı hücumlarını müşahidə edirik. Artıq indi bu yardım bu cəbhəyanı bölgədə elektrik təchizatını, istilik təchizatını bərpa etməyə imkan verir".
Azərbaycanla Ukrayna arasında enerji sahəsində əməkdaşlıq barədə Milli Məclisin deputatı Ceyhun Məmmədov Crossmedia.az-a danışıb.
O bildirib ki, bu gün Azərbaycan Ukraynaya humanitar yardımı davam etdirir: “Azərbaycan xalqı müharibənin nə olduğunu yaxşı anlayır və müharibədən əziyyət çəkən dövlətlərə hər zaman dəstək verir, prosesə töhfəsini göstərir. Bu, Azərbaycanın humanitar aksiyalarda fəal olduğunu təsdiqləyir. Bildiyimiz kimi, müharibə səbəbindən Ukraynanın enerji infrastrukturu ciddi ziyan görüb və bu yardım ölkə üçün çox vacibdir. Azərbaycanın atdığı bu addım yüksək qiymətləndirilir və Azərbaycan-Ukrayna münasibətlərinin inkişafına müsbət təsir göstərir.”
Lalə Rəvəndi
18:51 28.10.2025
Oxunuş sayı: 1745
