Azərbaycanın sülhyönümlü davranışı qarşı tərəf üçün böyük güzəştdir- Deputat
Azərbaycan Milli Məclisinin Sədri Sahibə Qafarova və Ermənistan Milli Assambleyasının sədri Alen Simonyan arasında görüş oktyabrın 21-də Cenevrədə, Parlamentlərarası İttifaqın 151-ci Assambleyası çərçivəsində baş tutub. Tərəflər iki ölkə arasında dialoqun davam etdirilməsi və sülh prosesinə parlament diplomatiyası vasitəsilə töhfə verilməsi məsələlərini müzakirə ediblər. Qeyd edək ki, spikerlərin bundan öncəki görüşü 2025-ci ilin aprelində Sankt-Peterburqda keçirilmişdi.
Keçirilən görüşün əhəmiyyəti barədə Milli Məclisin deputatı Nigar Məmmədova Crossmedia.az-a bildirib ki, Azərbaycan və Ermənistan arasında münasibətlərin normallaşması artıq real nəticələrlə özünü göstərir:
“Vaşinqton sammitində əldə olunan razılaşmalar tərəflərin dayanıqlı sülh istiqamətində praktik addımlar atmasını şərtləndirir. Cenevrədə Parlamentlərarası İttifaqın 151-ci Assambleyası çərçivəsində Azərbaycan və Ermənistan parlament sədrlərinin bir araya gəlməsi də bu baxımdan müsbət addımdır. Rəsmi məlumatdan aydın olur ki, spikerlər konstruktiv dialoqu davam etdirməyə hazırdırlar. Parlament diplomatiyası bu prosesə yalnız müsbət təsir göstərə bilər".
N. Məmmədovanın sözlərinə görə, İrəvanda vətəndaş cəmiyyəti nümayəndələrinin də görüş keçirməsi barədə məlumat mövcuddur və bu təşəbbüslər qarşılıqlı etimadın möhkəmlənməsi, iqtisadi əməkdaşlığın inkişafı və uzunmüddətli əlaqələrin qurulması baxımından əhəmiyyətli hesab olunur.
Deputat əlavə edib ki, Azərbaycan Prezidenti İlham Əliyevin Qazaxıstanda verdiyi bəyanat da regionda sülhə yönəlmiş addımların bariz nümunəsidir:
“Dövlət başçımız açıqlayıb ki, Ermənistana işğaldan bəri mövcud olan yüklərin tranzitinə qoyulan məhdudiyyətlər aradan qaldırılıb və artıq ilk tranzit Qazaxıstanın Ermənistana göndərdiyi taxıl yükü olub. Paşinyan da bu jestə görə Azərbaycan Prezidentinə təşəkkürünü bildirib. Bu, bir daha göstərir ki, Azərbaycan yekun sülh müqaviləsinin imzalanmasında maraqlıdır. Biz müharibədən dərhal sonra Ermənistana sülh əlimizi uzatmışıq və real addımlar gözləyirik".
O bildirib ki, Azərbaycanın sülhyönümlü davranışı qarşı tərəf üçün ən böyük güzəştdir:
“Ermənistanın məlum "ev tapşırıqlarını" yerinə yetirməzdən əvvəl Bakının praqmatik addımlarını düzgün qiymətləndirməsi vacibdir. Rəsmi Bakının bu mövqeyi sülh prosesinin reallığa çevrilməsi üçün mühüm fürsətdir".
Mehriban Yariyeva
23:50 22.10.2025
Oxunuş sayı: 1223
