Azərbaycan Ordusu Türkiyə modelinə keçir: Silahlı Qüvvələrdə dəyişikliklər edilir - RƏY
Zaman dəyişdikcə dövlətin müdafiə sistemi də yenilənməyə ehtiyac duyur. Ordu təkcə silahla deyil, düşüncə və idarəetmə ilə də güclənir. Bugünkü Azərbaycan Ordusu artıq sadəcə müdafiə gücü deyil, peşəkar və müasir bir hərbi sistemə çevrilməkdədir. Qanunvericilikdə edilən yeniliklər, xidmət müddətlərinin uzadılması, peşəkar hərbçilərin hazırlanması kimi addımlar bir məqsədə, ordunun keyfiyyət baxımından daha dayanıqlı və çevik olmasına xidmət edir. Bu, həm döyüş qabiliyyətinin artırılması, həm də gələcək nəsil hərbçilərin müasir standartlara uyğun formalaşması deməkdir.
Bu barədə Crossmedia.az- a danışan hərbi ekspert Emin Həsənli qeyd edib ki, qanunlar müəyyən zamanın tələblərinə görə dəyişir, təhlillər aparılır və həmin dövrün qanunvericiliyinə uyğun olaraq yeni qanunlar qəbul edilir, əvvəlki qanunlarda isə dəyişikliklər olunur:“Azərbaycan Ordusu Türkiyə modelinə keçir. Bu istiqamətdə qanunvericilikdə müasir standartlara uyğun bir çox dəyişikliklər edilir. Ordu quruculuğu prosesi davam edir və Azərbaycan Ordusu güclü ordudur. Qarşıya qoyulan tapşırıqları həm 44 günlük Vətən müharibəsində, həm də 1 günlük antiterror əməliyyatlarında yüksək səviyyədə yerinə yetirib.
Ordu quruculuğu prosesi davamlı bir prosesdir. Hərbi sahədə fəaliyyət elmin qanunlarına əsaslanaraq həyata keçirilir, bu istiqamətdə təhlillər aparılır. Təhlillər tam araşdırıldıqdan sonra qərarlar qəbul edilir. Hərbi qurumların bu cür əsaslı və təhlilə söykənən çıxışlar etməsi təqdirəlayiq haldır”.
E.Həsənlinin fikrincə, müddətdən artıq hərbi qulluqçuların, gizir və miçmanların 10 il müddətində müqavilə əsasında xidmət etməsi, növbəti illərdə bu müddətin artırılması ordumuzun daha da möhkəmlənməsi və peşəkar orduya keçid istiqamətində mühüm addım olduğunu göstərir:
“Bilirsiniz ki, ordumuzda bir çox sahələr artıq gizirlərə və müddətdən artıq hərbi qulluqçulara tapşırılıb. Bu proses get-gedə daha da genişlənir, çünki müəyyən sahələr sırf peşəkarlıq tələb edir və həmin sahələrdə bu işi bilən mütəxəssislər xidmət göstərirlər.
Bununla yanaşı, çağırış sistemi də daim qalacaq. Gizirlər və müddətdən artıq hərbi qulluqçular əsgərlik xidmətini keçdikdən sonra orduda qalmaq və bu peşəni seçmək istədiklərini bildirirlər. Onlar həkim müayinəsindən keçərək imtahan verirlər, daha sonra kurslara qəbul olunurlar. Kursu bitirdikdən sonra xidmətə başlayır və hərbi peşəni seçirlər.
Belə demək olar ki, çağırış sistemi ibtidai təhsilə bənzəyir. O olmasa, şəxs gələcəkdə ali və ya orta ixtisas təhsili alaraq müxtəlif peşələrə yiyələnə bilməz. Əsgərlik xidməti zamanı şəxs qərar verir ki, gələcəkdə hərbçi olmaq istəyir, yoxsa yox; hansı qoşun növündə və hansı ixtisas üzrə davam etmək istəyir bunu da həmin dövrdə müəyyənləşdirir”.
Müsahibimiz bildirib ki, gələcəkdə bu istiqamətdə təkmilləşdirmələr davam etdiriləcək: “Əgər əvvəllər müqavilələr 3 və ya 5 illik nəzərdə tutulurdusa, indi 10 illik müddətə bağlanır. Bu da hərbi qulluqçular üçün əlverişlidir, çünki iki dəfə müqavilə bağladıqdan sonra onların pensiya təminatı üçün yüksək şərait yaradılır.
Dövlətimiz hərbi qulluqçuların sosial vəziyyətini yaxşılaşdırmaq üçün davamlı, sistemli və ardıcıl addımlar atır”.
Türkanə Məşədiyeva
16:30 18.10.2025
Oxunuş sayı: 3050
