Paşinyan: Dördüncü Respublika sülh məntiqinə əsaslanır
Ermənistanın Baş naziri Nikol Paşinyan Facebook səhifəsində yayımladığı videomüraciətdə Dördüncü Respublikanın Üçüncü Respublikadan nə ilə fərqlənəcəyini izah edib.
Crossmedia.az xəbər verir ki, bu barədə erməni KİV-ləri məlumat yayıb.
Hakim “Vətəndaş müqaviləsi” partiyasının 7-ci qurultayında Paşinyan bildirib ki, Ermənistanın Dördüncü Respublikasının yaradılması partiyanın strateji məqsədi kimi elan olunur. Bu məqsəd partiyanın qurultayda qəbul etdiyi bəyannamədə də əksini tapıb.
Paşinyan deyib:
“Bir çoxları soruşur ki, Üçüncü və Dördüncü Respublika arasında fərq nədə olacaq? Fərq budur: Üçüncü Respublika münaqişə məntiqinə əsaslanırdı, Dördüncü isə sülh məntiqinə.
Üçüncü Respublikanın Konstitusiyası xalqın azad iradəsi və səsverməsi yolu ilə qəbul olunub-olunmaması barədə böyük şübhələr vardı, halbuki Dördüncü Respublikada belə şübhələr olmamalıdır.
Üçüncü Respublika dövründə hakimiyyətin xalqa məxsusluğu nisbidir, formal xarakter daşıyırdı, Dördüncü Respublikada isə bu, aydın və danılmaz olmalıdır.
Nəhayət, Üçüncü Respublika — Vətəni arzulamaq, Vətəni axtarmaq, arzulanan Vətəni tapmaq istəyi idi. Dördüncü Respublika isə odur ki, Ermənistan Respublikası artıq bizim arzularımızdakı Vətəndir və daha Vətən axtarmağa ehtiyac yoxdur.”
Səbiyyə Zayirova
15:06 08.10.2025
Oxunuş sayı: 2492
