Pentaqon Hərbi Dəniz Qüvvələrinə podratçı seçməyə icazə verib
Pentaqon büdcə gecikmələrindən sonra ABŞ Hərbi Dəniz Qüvvələrinə yeni nəsil F/A-XX gizli döyüş təyyarəsi layihəsi üzrə podratçı seçməyə icazə verib.
Crossmedia.az xəbər verir ki, müharibə naziri Pete Hegseth bu qərarı gələcək dəniz aviasiya modernləşməsi istiqamətində strateji irəliləyiş kimi qiymətləndirib.
Layihə, hazırda istismarda olan "F/A-18E/F" qırıcılarının 2030-cu illərdən etibarən mərhələli şəkildə əvəzlənməsini nəzərdə tutur. Boeing və Northrop Grumman final mərhələdə əsas rəqiblərdir və nəticənin yaxın zamanda açıqlanacağı gözlənilir.
Yeni nəsil "F/A-XX" platformasının əsas prioritetləri artırılmış uçuş məsafəsi, aşağı radiolokasiya görünürlüyü, daxili silah bölmələri və süni intellektlə idarə olunan sensor-dron inteqrasiyasıdır. Sistem “loyal wingman” (sadiq qanad yoldaşı) tipli pilotsuz aparatlarla birgə fəaliyyət göstərə biləcək.
Layihə, ABŞ donanmasının Çin kimi rəqiblərin uzaqmənzilli raket sistemlərinə qarşı hava üstünlüyünü qorumaq məqsədinə xidmət edir. "F/A-XX" proqramı "F-35C" təyyarələri ilə paralel inkişaf etdiriləcək və donanmanın iki pilləli döyüş aviasiyası konsepsiyasının əsas hissəsini təşkil edəcək.
12:35 08.10.2025
Oxunuş sayı: 2122
