Azərbaycan–İtaliya münasibətləri strateji tərəfdaşlıq müstəvisində inkişaf edir- Deputat
Azərbaycan və İtaliya münasibətləri enerji əməkdaşlığı fonunda xüsusi strateji xarakter daşıyır. Prezident İlham Əliyevin vurğuladığı kimi, bu gün Azərbaycan nefti İtaliyanın enerji balansında birinci, qazı isə ikinci yerdədir. Bu göstəricilər iki ölkə arasında qarşılıqlı etimad və uzunmüddətli tərəfdaşlıq əlaqələrinin bariz nümunəsidir. Əməkdaşlığın uğurlu inkişafı, təkcə iqtisadi maraqlara deyil, həm də səmimi münasibətlərə və güclü siyasi dialoqa əsaslanır. Bu da göstərir ki, Azərbaycan–İtaliya əlaqələri qarşılıqlı inam üzərində qurulmuş etibarlı tərəfdaşlığın modelidir.
Mövzu ilə bağlı Crossmedia.az-a açıqlama verən Milli Məclisin deputatı, Milli İstiqlal Partiyasının sədri Arzuxan Əlizadə bildirib ki, Azərbaycan–İtaliya əlaqələri ən üst səviyyədədir və Avropa İttifaqı (Aİ) ölkələri içərisində İtaliya Azərbaycanla ən yaxın və bir nömrəli siyasi, iqtisadi və ticarət əlaqələrinə malik ölkə kimi qiymətləndirilir:
"Azərbaycan və İtaliya arasında iki strateji müttəfiqlik haqqında sənəd mövcuddur. Birinci strateji tərəfdaşlıq haqqında sənəd 2015-ci ildə imzalanıb. 2020-ci ildə isə çoxtərəfli iqtisadi və strateji müttəfiqlik haqqında bəyannamə qəbul olunub. Bu sənədlər fonunda münasibətlərin müxtəlif sahələr üzrə inkişafı və artan dinamika diqqət mərkəzindədir".
Deputatın sözlərinə görə, Azərbaycan ümumilikdə Avropanın 10 ölkəsinə enerji daşıyıcıları ixrac edir və bu siyahıda birinci yeri İtaliya tutur:
"İtaliyaya həm neft, həm də qaz ixrac edilir. TAP və TANAP üzərindən həyata keçirilən ixrac, münasibətlərimizin inkişafına, iqtisadi əlaqələrin səmərəli şəkildə artmasına böyük töhfə verir. Hazırda İtaliyanın Azərbaycanda 100-dən artıq şirkəti fəaliyyət göstərir. Onlar tikinti, sənaye, kənd təsərrüfatı, enerji və digər sahələrdə çalışır, ölkəmizin iqtisadiyyatına sərmayələr yatırırlar. Bu əməkdaşlıq təhsil və mədəniyyət müstəvisində də özünü göstərir".
A. Əlizadə qeyd edib ki, Prezident Sercio Mattarellanın ikinci səfəri çərçivəsində açılışı keçirilən Azərbaycan–İtaliya Universiteti münasibətlərin daha da yaxınlaşmasına böyük təkan verəcək: "Bu münasibətlər Aİ ölkələri üçün də bir nümunə ola bilər. İtaliya Aİ daxilində böyük nüfuza malik bir dövlətdir. Azərbaycan–İtaliya əlaqələrinin artan dinamika ilə inkişafı, iki ölkə arasındakı əlaqələrin ən yüksək səviyyədə bərqərar olduğunu göstərir. Eyni zamanda bu, digər Avropa ölkələri üçün də nümunədir. Bu gün Aİ-nin 27 üzvündən 10-u ilə Azərbaycan strateji müttəfiqlik haqqında müqavilələrə malikdir. Amma bir daha qeyd etmək istəyirəm ki, tərəfdaşlıq münasibətlərimiz olan Avropa ölkələri arasında İtaliya birinci yerdədir".
Deputat vurğulayıb ki, məhz İtaliyaya nəql
edilən həm qaz, həm də neft məhsulları münasibətlərin inkişafına müsbət təsir
göstərir və strateji əməkdaşlığın perspektivlərini daha da gücləndirir.
Mehriban Yariyeva
21:38 01.10.2025
Oxunuş sayı: 947
