Xarici xəbərlər

Ağ Ev Trampın Qəzza planını açıqladı

Ağ Evin mətbuat xidməti ABŞ prezidenti Donald Trampın Qəzza münaqişəsinin həlli ilə bağlı 20 bənddən ibarət planını təqdim edib.

Crossmedia.az xəbər verir ki, bu barədə xarici KİV məlumat yayıb.

Plana görə, İsrail ordusu Qəzzadan çıxacaq və bölgədə hərbi əməliyyatları dayandıracaq. Bunun müqabilində isə 72 saat ərzində girovlar azad edilməlidir.

Sənəddə qeyd olunur ki, Qəzza “terrorizmdən azad ediləcək” və yenidən qurulacaq. HƏMAS və digər qruplar bölgənin idarəçiliyində iştirakdan tamamilə imtina etməlidirlər. Regional tərəfdaşlar isə onların öhdəliklərinin icrasına zəmanət verəcəklər.

Girovların azad edilməsindən sonra İsrail ömürlük cəza çəkən 250 nəfəri və Qəzzadan olan 1700 məhbusu azad edəcək. Silahı yerə qoymağa və sülh içində yaşamağa razı olan HƏMAS üzvlərinə amnistiya veriləcək. İstəyənlər üçün başqa ölkələrə təhlükəsiz çıxış dəhlizi yaradılacaq.

Qeyd edək ki, razılaşmanın qəbulundan dərhal sonra bölgəyə humanitar yardım daxil olacaq. Yardım BMT, Qırmızı Aypara və digər beynəlxalq təşkilatlar vasitəsilə, tərəflərin müdaxiləsi olmadan paylanacaq.

Qəzzanın idarəçiliyi müvəqqəti olaraq qeyri-siyasi texnokratlardan ibarət fələstinli komitəyə həvalə ediləcək. Onlar şəhər təsərrüfatı və kommunal xidmətlərin işləməsinə cavabdeh olacaqlar.

Bundan əlavə, iqtisadi bərpa planı hazırlanacaq, sərmayələr cəlb ediləcək və xüsusi güzəştlərlə iqtisadi zona yaradılacaq. Beynəlxalq sabitlik qüvvələri isə fələstinli polis bölmələrini təlim və dəstəklə təmin edəcəklər.

Belə ki, İsrail Qəzzanı nə işğal, nə də anneksiya edəcək. Əgər HƏMAS planı rədd etsə və ya ləngitsə, qeyd olunan tədbirlər İsrailin hərbi nəzarətindən Beynəlxalq Sabitlik Qüvvələrinə verilmiş ərazilərdə həyata keçiriləcək. ABŞ isə İsrail və fələstinlilər arasında davamlı siyasi dialoqa vasitəçilik edəcək.

Fatimə Məmmədova