Azərbaycan və Keniya arasında müxtəlif sahələrdə əməkdaşlıq məsələləri müzakirə edilib
Azərbaycanın Keniyadakı səfiri Sultan Hacıyev bu ölkənin Mombasa vilayətinin qubernatoru Abdulsuamad Şerrif Nassir ilə görüşüb.
Səfirlikdən Crossmedia.az-a bildirilib ki, görüşdə Azərbaycan və Keniya ikitərəfli əlaqələrində dinamik inkişafdan razılıq ifadə olunub və regionlar arasında əməkdaşlığın iki ölkənin münasibətlərinin dərinləşməsinə mühüm töhfə verəcəyi vurğulanıb.
Qubernator regional əməkdaşlığın genişləndirilməsi üçün mövcud potensialdan faydalanmağın vacibliyini vurğulayıb. Qeyd edib ki, Keniyanın inkişaf etmiş inzibati vahidlərindən biri olan Mombasa vilayəti Hind Okeanı sahilində turizm və ticarət mərkəzidir, burada Şərqi və Mərkəzi Afrikanın ən böyük dəniz limanı yerləşir. Bununla yanaşı, Mombasa daşınmaz əmlak, infrastruktur, mavi iqtisadiyyat və logistika sahələrində cəlbedici imkanlar təklif edir. Qubernator Azərbaycanın müasir şəhərsalma təcrübəsinə malik biznes dairələrinin bu regiona marağının artırılması üçün zəruri addımlar atmağa hazır olduğunu bildirib. O, iki ölkə arasında turizm əlaqələrinin inkişafında böyük potensial olduğunu vurğulayaraq, qardaşlaşmış şəhər münasibətlərinin təcrübə mübadiləsi və mədəni əlaqələrin inkişafı üçün əhəmiyyətli olduğunu qeyd edib.
Azərbaycanın 2026-cı ildə BMT-nin Ümumdünya Şəhərsalma Forumunun 13-cü Sessiyasına (WUF13) və Ümumdünya Ətraf Mühit Gününə (WED2026) ev sahibliyi edəcəyini deyən səfir Sultan Hacıyev qeyd edib ki, WUF13 çərçivəsində Azərbaycan və Keniya arasında sıx işbirliyi qlobal əməkdaşlığa fayda verməklə bərabər, əlçatan mənzillər və dayanıqlı şəhərlər mövzusunun da önə çıxarılmasına töhfə olacaq. S.Hacıyev sentyabrın 24-də Keniya Prezidentinin təşəbbüsü ilə BMT Baş Assambleyasının 80-ci sessiyası zamanı Nyu-Yorkda keçirilən “Layiqli və sərfəli mənzil təminatı” üzrə qlobal liderlərin yüksəksəviyyəli dəyirmi masasında Azərbaycanın xarici işlər nazirinin də iştirak etdiyini məmnuniyyətlə vurğulayıb. Səfir, həmçinin Azərbaycanın dövlət quruluşu, tarixi, mədəniyyəti, iqtisadiyyat və turizm sahələrindəki potensialı, nəqliyyat dəhlizləri barədə məlumat verib, o cümlədən Vətən müharibəsinin tarixi nəticələri, postmünaqişə dövründə ərazilərimizdə aparılan genişmiqyaslı bərpa-yenidənqurma və humanitar minatəmizləmə işləri haqqında danışıb.
18:55 30.09.2025
Oxunuş sayı: 4313
