Ət köşklərinin yaradılması qiymət sabitliyinə təsir göstərməyəcək - RƏY
Milli Məclisin Aqrar siyasət komitəsinin iclasında müzakirələr zamanı bildirilib ki, bələdiyyələr öz ərazilərində qanunvericilik çərçivəsində ət köşkləri yarada bilərlər. Təklif müəlliflərinin sözlərinə görə, bu addım həm mal-qara sahiblərinin məhsullarını bazara çıxarmasını asanlaşdıracaq, həm də bələdiyyələrə əlavə gəlir gətirəcək. Həmçinin qeyd olunub ki, bələdiyyələrin yerli vətəndaşların məhsullarının satışını təşkil etməsi mümkündür.
Bu təklif kənd təsərrüfatı istehsalçılarının bazara çıxış imkanlarını genişləndirə bilər. Ət köşklərinin yaradılması həm qiymətlərin nisbətən sabitləşməsinə, həm də yerli icmaların iqtisadi fəallığının artmasına şərait yarada bilər. Amma bunun üçün ciddi nəzarət və sanitar qaydaların təmin edilməsi vacibdir.
Mövzu ilə bağlı ReAl partiyası Siyasi Komitəsinin sədri, iqtisadçı Natiq Cəfərli Crossmedia.az saytına açıqlama verib.
N.Cəfərli bələdiyyələrin səlahiyyətinin və məsuliyyətinin artırılmalı olduğunu bildirib:
“Bələdiyyələrin bir çox səlahiyyətləri var, amma o səlahiyyətləri yerinə yetirmək üçün imkanları varmı, maliyyə imkanları varmı ki, heç olmasa o köşkləri yaratsınlar, ət alışını həyata keçirsinlər? Bu çox ciddi məsələlərdir. Bələdiyyələrin səlahiyyəti və məsuliyyəti artırılmalıdır. Onların maliyyə dayanıqlığı yüksəlməlidir. Ondan sonra bələdiyyələr hansı işi tələb edə bilər? Bir də ki, bu problem ətin satışı ilə bağlı deyil, əksinə ətin kəsilməsi ilə bağlıdır. Fermerlərin bazara çıxış imkanları qorunmalıdır. Yəni onların marketlərə birbaşa çıxışı olmalıdır. Müqavilələri olmalıdır. Bu da yetərli deyil. Bizdə iri buynuzlu və xırda buynuzlu mal-qara kəskin şəkildə azalır. O köklərin qurulması ilə azalmanın qarşısını almaq mümkün olacaqmı? Təbii ki yox. Bunun qarşısını almaq üçün yem bazarı genişləndirilməlidir. Fermerlərə daha çox dəstək verilməlidir. Onların uzunmüddətli və çox aşağı faizli kreditlərə çıxış imkanları təmin edilməlidir. Mal-qaranın sığortası təmin edilməlidir. Yəni bütün bunlar olmalıdır ki, istehsal artsın, istehsal artmalıdır ki, qiymət tənzimlənməsi və qiymətin sabitləşməsi mümkün olsun. Yəni bu köklərin yaradılması qiymətin sabitləşməsinə təsir göstərəcək əsas amil deyil”.
Nicat Rüstəmzadə
13:21 13.09.2025
Oxunuş sayı: 1381
