Tramp Putinlə danışıqlar fonunda yeni sanksiyalar və gömrük rüsumlarını elan edir
ABŞ-ın dövlət katibi Marko Rubio bildirib ki, prezident Donald Trampın Vladimir Putinlə görüşməsi üçün əvvəlcə bir sıra vacib məsələlərin həll olunması lazımdır. Onun sözlərinə görə, Ukrayna münaqişəsinin həllində ərazi məsələləri əsas məqam olacaq. ABŞ hesab edir ki, münaqişənin sonuna yaxınlaşırlar, lakin qarşıda hələ çox iş var.
Crossmedia.az xarici mətbuata istinadən xəbər verir ki, Rusiyayla danışıqlarda irəliləyişə baxmayaraq, Tramp yaxın günlərdə Moskvaya qarşı ikinci dərəcəli sanksiyalar tətbiq etməyi planlaşdırır. Putinlə telefon danışığı hələlik planlaşdırılmasa da, görüşün yaxın gələcəkdə baş tutması mümkündür. Trampın xüsusi nümayəndəsi Uitkoff Rusiya lideri ilə məhsuldar danışıqlar aparıb.
ABŞ prezidenti, həmçinin ölkəyə idxal edilən mikrosxemlər və yarımkeçiricilər üzrə təxminən 100%-lik yüksək gömrük rüsumlarının tətbiq olunduğunu açıqlayıb. Lakin bu, yalnız ABŞ-da istehsal qurmağı öhdəsinə götürməyən şirkətlərin məhsullarına şamil edilir.
Jurnalistlərin suallarını cavablandıran Tramp təsdiqləyib ki, Rusiyaya qarşı tətbiq edilən sanksiyalar artıq Hindistanı da əhatə edir və bu tədbirlər yaxın vaxtlarda Çini də daxil olmaqla digər ölkələrə də şamil oluna bilər. Prezident əlavə edib ki, İranla bağlı vəziyyət çox mürəkkəb olub, lakin qarşıdakı illərdə dəyişikliklər gözlənilir və danışıqların yenilənməsi mümkündür.
Tramp Putinlə danışıqlara nikbin yanaşdığını bildirib: “Bu gün çox yaxşı danışıqlar oldu və görüşün çox tezliklə baş tutması üçün yaxşı şans var”. O, ABŞ-ın beş münaqişəni həll etdiyini və İranın nüvə potensialını tamamilə məhv etdiyini xatırladıb.
Yeni ticarət rüsumları artıq 7 avqust gecəyarısından etibarən qüvvəyə minib və ABŞ büdcəsinə milyardlarla dollar qazandıracağı gözlənilir. Tramp vurğulayıb ki, bu tədbirlər uzun illər ABŞ-dan istifadə edən və bu halı məsxərəyə çevirən ölkələrə qarşı yönəlib.
Pərvin Hacıyeva
10:27 07.08.2025
Oxunuş sayı: 660
