Avropada qarışqa təlaşı: Tunellər qazıb, elektriki kəsirlər
Aralıq dənizi bölgəsinə məxsus Tapinoma magnum adlı qarışqa növü Fransaya, Almaniyaya, Belçikaya, Hollandiyaya və İsveçrəyə sürətlə yayılır.
Bu qarışqa növü Avropada koloniyalaşmağa başlayıb. Sürətlə yayılan növ, Mərkəzi və Şimali Avropadakı bir çox ölkəni zəbt edərək infrastruktura ciddi ziyan vurur. Əslən Əlcəzair, Mərakeş, Tunis, İspaniya və İtaliyaya məxsus olan bu növ, artıq adıçəkilən ölkələrdə müşahidə olunmaqla yanaşı, Manş boğazını keçərək Britaniyaya da çatmaq üzrədir.
Qarışqalar yolların altında tunellər qazır, elektrik kabellərini dişləyərək elektrik və internetin kəsilməsinə səbəb olurlar.
Crossmedia.az xəbər verir kic “Naftemporiki” qəzetinin xəbərinə görə, Böyük Britaniya Zərərvericilərlə Mübarizə Assosiasiyasının (BPCA) texniki direktoru Nayl Qallager bildirib: “Belə növlər həmişə təhlükə daşıyır. Hər bir invaziv növ kimi, əgər T. magnum burada yerləşərsə, başağrısına çevrilə bilər. Onlar böyük super koloniyalar yaradır, yerli növləri sıradan çıxarır və hətta səkilərin altına girərək struktur problemlərinə yol aça bilirlər”.
Bu növ, yorulmaz şəkildə genişlənmək xüsusiyyəti ilə 60 hektarlıq ərazini əhatə edən və 20 milyon qarışqadan ibarət super koloniyalar formalaşdırır. Əsasən müxtəlif ölkələrdən gətirilən bitkilərlə yayılan bu qarışqaların şimala doğru hərəkət etməsinə iqlim dəyişikliyi də təsir edir. Son illərdə Britaniya və Şimali Avropanın bəzi bölgələrində qışların daha mülayim keçməsi və yayların daha uzun sürməsi, bu növün orada da məskunlaşmasını asanlaşdırır.
Mədinə Cəlilova
22:40 11.06.2025
Oxunuş sayı: 11876
