İsrail Trampdan Suriya ilə danışıqlarda vasitəçi olmağı xahiş edib
İsrailin Baş naziri Benyamin Netanyahu ABŞ administrasiyasına müraciət edərək, İsraillə Suriya arasında mümkün danışıqlarda vasitəçi rolunu üzərinə götürməsini istəyib.
Crossmedia.az xəbər verir ki, bu barədə ABŞ mətbuatı diplomatik mənbələrə istinadla məlumat yayıb.
Bildirilib ki, Netanyahu bu təklifi ABŞ-nin Suriyadakı xüsusi nümayəndəsi və hazırda Türkiyədəki səfiri Tom Barakın ötən həftə İsrailə səfəri zamanı irəli sürüb. Görüş zamanı Netanyahu, Suriyada formalaşan yeni administrasiya ilə təhlükəsizlik sahəsində ilkin razılaşmalar və mümkün sülh danışıqlarına başlamaq niyyətində olduğunu qeyd edib.
Məlumata görə, İsrail tərəfi bu cür dialoqun yalnız ABŞ-nin vasitəçiliyi ilə mümkün ola biləcəyini düşünür və bu missiyanın Tramp administrasiyası tərəfindən həyata keçirilməsini məqsədəuyğun hesab edir.
Qeyd edək ki, hazırda İsrail və Suriya arasında diplomatik münasibətlər mövcud deyil və tərəflər texniki baxımdan hələ də müharibə vəziyyətindədir. Ekspertlər hesab edirlər ki, mümkün vasitəçilik təşəbbüsləri regionda sabitliyin təmin olunması baxımından mühüm rol oynaya bilər.
21:55 11.06.2025
Oxunuş sayı: 1255
