Cənubi Koreya sərhəddəki təbliğat səsgücləndiricilərini dayandırdı
Cənubi Koreya, Şimali Koreya ilə sərhəd bölgəsindəki təbliğat səsgücləndiricilərinin fəaliyyətini dayandırdığını açıqlayıb. Bu addım, iki Koreya arasında etimad və sülhü bərpa etmək məqsədilə atılıb.
Crossmedia.az CNN TÜRK agentliyinə istinadla xəbər verir.
Yonhap agentliyinin xəbərinə görə, Cənubi Koreya Baş Qərargah Rəisliyi (JCS) yayımladığı bəyanatda, sərhəddə Şimali Koreyaya qarşı aparılan səsgücləndirici yayımlarının dayandırıldığını bildirib. Açıqlamada bu qərarın Koreya yarımadasında sülh və qarşılıqlı güvəni yenidən qurmaq üçün atılan bir addım olduğu vurğulanıb.
Yeni vəzifəyə başlayan Prezident Li Cae-myong da məsələyə münasibət bildirib:
“Koreya yarımadasında daimi sülh qurmaq üçün Şimali Koreya ilə dialoq və əməkdaşlıq yolları axtaracağıq”, – deyə o bildirib.
Məlum olduğu kimi, ötən il Cənubi Koreyada yaşayan Şimali Koreyalı qaçqınlar və aktivistlər Şimali Koreya əleyhinə vərəqələrlə dolu şarları sərhəddən göndərmişdi. Cavab olaraq, Şimali Koreya mayın sonunda 2000-dən çox zibil daşıyan şarı Cənubi Koreyaya göndərmişdi.
Bunun ardınca Cənubi Koreya ordusu sərhəd bölgələrində səsgücləndiricilərlə təbliğat yayımlarına başlamışdı. Lakin son qərarla bu fəaliyyətlər müvəqqəti olaraq dayandırılıb.
Nigar Rəhimova
16:00 11.06.2025
Oxunuş sayı: 8111
